Komîteya Amadekar a Meşa 1ê Îlonê ku li Amedê bê lidarxistin li avahiya DEM Partiyê ya Amedê daxuyanî da û xwest herkes beşdarî meşa 1ê îlonê bibin.
Platforma Ked û Demokrasiyê ya Amedê û Platforma Saziyên Demokratîk, li avahiya DEM Partiyê ya Amedê têkildarî meşa 1ê Îlonê civîna çapemeniyê pêk anî. Di civînê de endamên platformê amade bûn. Li salonê pankarta “Di pêşengtiya Platforma Ked û Demokrasiyê ya Amedê û Platforma Saziyên Demokratîk de em di 1ê Îlonê de ji bo avakirina civaka demokratîk em ber bi aştiyê ve dimeşin” daliqandin.
‘1ê Îlona 2025an dê dîrokî be’
Di daxuyaniyê de ewilî Hevserokê DEM Partiyê yê Amedê Abbas Şahîn axivî. Abbas Şahîn bal kişand ser banga Rêberê Gelê Kurd Abdullah Ocalan a di 27 Sibatê de kir û qala pêvajoya heyî kir. Abbas Şahîn destnîşan kir ku 1ê Îlonê Roja Aştiyê ya Cîhanê ya sala 2025an dê dîrokî be û hemû gel vexwend meşê.
‘1ê Îlonê ji bo civakeke azad girîng e’
Aktîvîsta Tevgera Jinên Azad (TJA) Bahar Pekerê jî destnîşan kir ku 1ê Îlonê ji bo civakeke azad, jinan, ciwanan û kedkaran girîng e û divê herkes xwedî lê derkeve. Bahar Pekerê bang kir ku ewilî jin û ciwan hemû gelê Amedê xwedî li 1ê Îlonê derkeve.
Di meşê de dê Hevserokê Giştî yê DEM Partiyê Tûncer Bakirhan û Hevseroka KESKê Ayfer Koçakê amade bibin.
