Endamên Tevgera Jinên Azad di çarçoveya 1ê Îlonê de li Cizîrê aştî nîqaş kir.
Li navçeya Cizîr a Şirnexê ji aliyê endamên Tevgera Jinên Azad TJA) ve bi boneya 1ê Îlonê Roja Aştiyê ya Cîhanê meş hat lidarxistin û kursiyê axaftina li ser aştiyê hat danîn. Bi sedan jinên ku li taxa Sûrê kom bûyîn bi pankarta, “Ji bo civakek azad û demokratîk aştî” heya Parqa Çarkendak meşiyan.
Piştî meşê endama Tevgera Jinên Azad (TJA) Adalet Fîdan got ku bi dehan salan e li Kurdistan jinên kurd aştiyê dixwaze û wiha axivî; “Bi banga Rêberê Gelê Kurd Abdullah Ocalan îro yên herî zêde xwedî li aştiyê derdikevin dayîk û jinên kurd in. Em wek jinên kurd ji bo aştiyê em ê di asta herî jor de xwedî li pêvajoya aştiyê derkevin.”
Piştî axaftina Fîdan dayik û jinên tevlî bernameya kursiya nîqaşa aştiyê bûne li ser 1ê Îlonê nêrînên xwe anîn ziman. Dayik û jinên axaftîn banga Rêberê Gelê Kurd Abdullah Ocalan a 27ê sibatê bi bîr xistin û gotin bila komîsyona li Meclîsa Tirkiyeyê hatiye avakirin peywira xwe bi cih bîne.
Piştî axaftinan dayikên aştiyê laçikên xwe yên spî bi daran ve girêdan û govenda aştiyê gerandin.
