Awazê Çiya albûma nû ‘Dara Jiyanê’ pêşkêşî muzîkhezan kir. Albûma ku li malpera Youtube ya Med Hunerê hate weşandin, ji deh berhemên nû pêk tê.
Koma muzîkê ya profesyonel Awazê Çiya bi berhemên xwe yên bi nav û deng û berhem û klîbên serkeftî cihê xwe di dilê bi milyonan mirovî de digire. Koma Awazê Çiya tevî şert û mercên zehmet ên li çiyayan jî bi awayekî serkeftî xebatên xwe yên hunerî dimeşîne û gel van berheman bi kêfxweşî pêşwazî dike.
Delîla Meyaser, Zerdeşt Dersim, Devrîm Dîlok, Michael Panser, Zanîn Herekol, Şoreş Semsûr, Ronî Wan û Agir Serîhildan ên ku di rêya têkoşîna azadiyê de jiyana xwe ji dest dan jî di nav komê de cih digirtin.
Koma ku bi mehan e li ser albûmeke nû dixebitî, amadekariyên xwe qedand û albûma xwe bi navê “Dara Jiyanê” pêşkêşî muzîkhezan kir. Produktoriya albûmê ji aliyê Hunergeha Şehîd Zerdeşt ve hate kirin.
Albûm li malpera Youtube ya Med Hunerê hate weşandin. Awazê Çiya bi 10 berhemên nû derdikeve pêşberî muzîkhezan.
Navên stranên di albumê de cih digirin ev in: “Hevalno, Azê, Honê Ma, Fedaî, Çepik, Çîçek, Dara Jiyanê, Heval Agir, Rêwiyo, Payîz.”
Klîba Dara Jiyanê
Awazê Çiya ji bo strana “Dara Jiyanê” klîbek amade kir. Med Hunerê klîb li ser malpera xwe ya Youtubeyê parve kir. Muzîkhez li ser malperê hem dikarin li stranên albûmê guhdarî bikin hem jî li klîbê temaşe bikin.
