Amed – Berdana Mehmet Alî Taşli ku 30 sal in girtî ye û niha li Girtîgeha Ereglî ya Konyayê tê ragirtin salekê hate dirêjkirin. Xwişka Taşli, Gulê Taşli diyar kir ku parêzerê wan îtîrazî biryarê kiriye û xwest birayê wê demildest were berdan.
Mehmet Alî Taşli (58) ku di sala 1994an de li Amedê hate binçavkirin û girtin niha li Girtîgeha Ewlehiya Bilind a Ereglî ya Konyayê de tê ragirtin. Lijneya Çavdêrî û Îdareyê ya girtîgehê tevî ku Taşli cezayê lê hatiye birîn qedandiye û diviyabû 21ê Kanûnê hatibûya berdan, berdana wî salekê dirêj kir.
‘Hêviya me şikandin’
Xwişka Mehmet Alî Taşli, Gul Taşli ya ji ajansa me re axivî, diyar kir ku di 18ê Kanûnê de (duh) birayê wê bi telefonê bi wan re axivî ye. Gulê Taşli axaftina bi telefonê wiha vegot: “21ê Kanûnê cezayê li birayê min hatiye birîn da bi dawî bibe. Me amadekariya xwe dikir ku em biçin wî bînin. Lê mixabin duh telefon kir got cezayê min salekê dirêj kirine. Em li bendê bûn, me digot heke cezayê wî dirêj bikin jî herî zêde wê sê meh be. Lê mixabin salekê dirêj kirin. Bavê min deqîqe û saniye dihejmartin û li benda wî bû. Em bi kelecanî li bendê bûn. Hêviya me şikandin.”
‘Bila pergal ji vê zilmê bi paş ve gavê biavêje’
Gul Taşli, îşkence û hovitiya li Zîndana Amedê hate kirin bi bîr xist û wiha berdewam kir: “Girtîgehên niha ji wê xerabtir in. Wexta girtiyên me di vê girtîgehê de bûn. Dema xwarinek xwastibûya me dikarî ji wan re bibin. Pergala qawişê bû, hevalên hev li cem hev bûn. Girtîgeha ku birayê min tê de her kes di yek odeyê de dimîne. Yanî kes rûyê kesê nabîne. Dema hevdîtinê tu nikarî silavekê bidî malbatên girtiyên din. Ev zilm e. Em hêvî dikin ev pergal ji vê zilma dike bi paş ve gavê biavêje. Ev sih sal in em li bendê ne.”
‘Dayika min bi hesreta wî mir’
Gul Taşli da zanîn ku dayika wê bi hesreta dîtina kurê xwe jiyana xwe ji dest da û got: “Dayika min bi hesreta wî mir, bavê min pîr e nexweş e, me got belku derkeve hinek dema xwe bi wî re derbas bike. Ew jî nebû. Min ji birayê xwe re got ez pir xemgîn bûm. Got ‘Na xwe xemgîn nekin. 30 sal in li vir im. Bibe ez ê şeş salên din jî razim. Moralê wî baş bû. Em dizanin zilm e neheqî ye.”
‘Em dixwazin rayedar îtîrazê li ber çavan bigirin’
Gul Taşli diyar kir ku parêzerê malbatê ji ber biryara derbare birayê wê de hatiye dayîn îtîraz kiriye û wiha got: “Parêzer ji bo biryar were betalkirin daxwazname da û îtîraz kiriye. Em dixwazin rayedar wê îtîrazê li ber çavan bigire. Girtiyên ku cezayê li wan hatiye birîn qedandine bila berdin.”
