Amed – Parlamenterê DEM Partiyê Omer Faruk Hulaku piştî serdana Girtîgeha Ereglî axivî û diyar kir ku dozgerê nû bi helwesteke xirab a li dijî pêvajoya aştiyê jî mafên bidestxistî yên girtiyan paşve digire.
Li Girtîgeha Ewlehiya Bilind a Eregliyê ya Konyayê pirsgirêk didomin. Beriya 2 mehan dozger hat guhertin. Dozgerê nû ji roja ku hatiye heta niha zext û bêhiqûqiya li ser girtiyên siyasî kêm nekiriye. Ajansa me di 4ê Mijdarê de derbarê van pirsgirêkan de nûçeyek çêkiribû. Piştî nûçeya me, parlamenterên DEM Partiyê yê Omer Faruk Hulaku û Mehmet Zekî Îrmez di 12ê Mijdarê de li Girtîgeha Eregliyê serdana girtiyên siyasî kir û li girtiyan guhdarî kir.
Parlamenterê DEM Partiyê yê Çewligê Omer Faruk Hulaku piştî serdanê ji Ajansa Welat re axivî.
Omer Faruk Hulaku diyar kir ku piştî ku rêveberiya nû hat girtîgehê, zextên li ser girtiyên siyasî zêde bûne. Omer Faruk Hulaku bal kişand ser biryara Lijneya Îdare û Çavdêriyê û got: “Astengkirina berdana girtiyan, dirêjkirina dema înfazê û di nav bêbaweriyê de hiştina girtiyan binpêkirineke giran a mafan e. Tevî ku girtiyê siyasî Sînan Çelîk cezayê xwe qedandiye jî nayê berdan. Ev lijne mafan naparêze, bûye amûra cezakirinê.”
‘Tecrîdek giran heye’
Omer Faruk Hulaku diyar kir ku li Girtîgeha Eregliyê 12 girtiyên siyasî hene ku cezayên giran girtine û ew xistine nav qawîşên edlî û wiha got: “Daxwaza wan ew e ku bi hev re bimînin, lê nayê bicihanîn. Rojname û radyo hatine qedexekirin. Ev tişt tecrîdê kûrtir dikin. Dema ku girtî diçin nexweşxaneyê, 2 kelepçeyan li destên wan dixin. Girtiyên siyasî ji ber vê helwesta bêrûmet neçar dimînin ku neçin nexweşxaneyê. Mafê tenduristiyê tê desteserkirin.”
‘Dozgerê girtîgehê li dijî pêvajoyê helwesteke xirab nîşan dide’
Omer Faruk Hulaku bal kişand ser pêvajoya Aştî û Civaka Demokratîk û wiha axivî: “Li Tirkiyeyê behsa Pêvajoya Aştî û Civaka Demokratîk tê kirin; divê pirsgirêkên girtîgehan jî wekî mijareke girîng bên nîqaşkirin û bibe mijarek sereke. Heta ku edalet û mafên bingehîn di nav girtîgehan de neyên garantîkirin, civaka demokratîk ava nabe. Dozgerê ku li wir e, li dijî pêvajoyê helwesteke xirab nîşan dide û mafên ku hatine bidestxistin paşve digire. Bi tecrîd û cezayên dîsîplînê nikarin îradeya girtiyan bişkînin. Divê helwesta vî dozgerî bê teftîşkirin û daxwazên girtiyan bên qebûlkirin.”
‘Em ê li Meclisê bikin rojev’
Omer Faruk Hulaku di dawiya axaftina xwe de diyar kir ku name, wêne û xwendina pirtûkan li girtîgehê tên astengkirin û got: “Em ê li pey hemû îdiayan bisekinin. Hewldanên me yên li Wezareta Edaletê û li cem îdareyê dê bidomin. Em ê li Meclisê bi pêşniyazên pirsan û bi serlêdanên Komîsyona Lêkolîna Mafên Mirovan van neheqiyan derxin holê. Mafê edalet, jiyan, tenduristî û rûmeta girtiyan emanetî hemû civakê ye.”










