Berdevka Wezîrê Karên Derve ya DYAyê Tammy Bruce diyar kir ku ew li Sûriyeyê piştgiriyê didin çareseriya bi rêya diyalogê û got: “HSD dixwaze agirbesta li bakurrojhilat berfirehtir û mayinde bibe û ev agirbest veguhera aştiyê. Em piştgiriyê didin vê daxwazê.”
Berdevka Wezîrê Karên Derve ya DYAyê Tammy Bruce di civîna çapemeniyê ya rojane de li Washingtonê geşedanên li Rojhilata Navîn nirxand.
Di civînê de rojnamegerekî daxuyaniya Fermandarê Giştî yê Hêzên Sûriyeya Demokratîk (HSD) Mazlum Ebdî bi bîr xist ku digot “Em li Sûriyeyê rêveberiyeke nenavendî diparêzin.” Li ser vê yekê Bruce pevçûnên li Siwêdayê bi bîr xist û got: “Dîplomasî, rêya herî baş a sekinandina tundiyê û avakirina çareseriyeke aştiyane û mayinde ye. DYA serfiraze ku li Siwêdayê navbeynkariya çareseriyê dike û tevî Fransayê li bakurrojhilat ji bo Sûriyeyek yekparçe navbeynkariya entegrasyonê dike. Rêya li pêşiya me aydê Sûriyeyiyane. Em bang li hemû aliyan dikin ku aramiyê biparêzin û cudahiyan ne bi rijandina xwînê lê bi rêya diyalogê pirsgirêkan çareser bikin. Sûriye îstîqrarê û Sûriyeyî aştiyê heq dikin.”
Bruce got ku Sefîrê DYA’yê yê Tirkiyeyê Tom Barrack ji bo aramî û ewlehiya Sûriyeyê bi hemû aliyan re di nava têkiliyan de ye û di mijara entegrasyona HSDê de jî piştgiriyê didin diyalogê. Tammy Bruce wiha got: “Helbet em hemû civînên berhemdar ên di navbera HSD û Serokkomar El-Şara de bi kêfweşî pêşwazî dikin. HSD dixwaze agirbesta li bakurrojhilat berfirehtir û mayinde bibe û ev agirbest veguhera aştiyê. Em piştgiriyê didin vê daxwazê. Bêguman aştî û refaha Sûriyeyê girêdayî hikûmeta nû ye.”
Bruce da zanîn ku ji bo çareserkirina pirsgirêkan ew piştgiriyê didin rêbaza demokrasî û dîplomasiyê.
Pirsa têkildarî komkujiya DAIŞê ya 3yê Tebaxa 2014an a li Şengalê, qirkirina Êzidiyan û vegera li Şengalê jî Bruce wiha bersivand: “11 sal berê bû. Bi hezaran kesan jiyana xwe ji dest dan û 2 hezar û 700 kes winda ne. Girîng e ku piştgiriyê bidin kesên hêj dijîn û lêgerîna edaletê dikin. Ewlehî û îstîqrara li Şengalê ji bo civaka Êzidî biewle, bi dilxwazî û birûmet vegerin girîng e. Êzidî, firsenda jinûveavakirina jiyan û warê xwe heq dikin.”
