Şaxa îHDê ya Amedê li ser şer, bîr û aştiyê panel li dar xist. Di panelê de wiha hat gotin: “Divê berpirsiyarê wan bûyeran efûya xwe bixwaze û ji bo avakirinê her tiştî bike. Paşê heqîqet dê derkevê holê. Bîr di nava jiyanê de ye.”
Şaxa Komeleya Mafên Mirovan a Amedê bi sernavê “Çavderiya 10 salan a şer, bîr û aştî” li Navenda Kongereyê ÇandAmedê navçeya Sûrê panel li dar xist. Hevşaredarê Bajarê Mezin a Amedê Dogan Hatûn, endam û rêveberên ÎHDê, rêveberên saziyên civakî û gelek kes tev li panelê bûn.
Destpêka peyama Hevseroka Giştî ya ÎHDê Eren Keskîn hate xwendi. Eren Keskîn ji ber ew ne li wir xemgîniya xwe anî ziman. Di peyama Eren Keskîn de ev tişt hatin parvekirin: “Di serî de ez her kesî silav dikim. Îro min dixwest ez di nava wan de bim. Lê mixabin ji ber ku ez ê herim mêrasîma Emîne Ocak ez nikarim di nava wan de bim. Bîr, çavkanî ji bo aştiyê gelek girîng e. ÎHD ji bo aştiyê dê her dem li vir be.”
‘Civaka sivîl nekarî tev li pêvajoya 2013an bibe’
Piştre endamê Komîsyona Girtîgehan a ÎHDê Yusuf Erdogan axivî. Yusuf Erdogan bimbîr xist ku dema ÎHD hat avakirin gelek şer hebû û wiha axivî: “Wê demê rêxistinên civakî li dijî binpêkirina mafê mirovan xebatên xwe berdewam dikirin. Piştî salên dirêj pêvajoya di sala 2013an dest pê kir. Di nava gel de hêviya aştiyê geş bû. Lê civaka sivîl zêde nekarî tev li pêvajoyê bibe. Pêvajo xirabû û dîsa şer dest pê kir. Ji bo şer bisekine ÎHD ket di nava hewldanê lê hat astengkirin. Îro jî pêvajoyek nû hatiye destpêkirin. Lê heman sazî ji bo aştiyê destê xwe dixe di bin bar de. Divê ev bê guherandin. ÎHD her dem ji bo aştiyê li vir bû, ji bo aştiyê her tişt kir.”
‘Bîr di nava jiyanê de ye’
Paşê Serokê Weqfa Mafê Mirovan a Tirkiyeyê (TİHV) Metîn Bakalci li ser mijara “Di dema şer de giringiya avakirina bîrê” pêşkêşiyek kir. Metîn Bakalci diyar kir ku eger ew bikarin êşa xwe derman bikin bîr jî dê baş bin û wiha got: “Mijara bîr gelek girîng e. Emîne Ocak 17ê Gulanê ji bo zarokê xwe dest bi çalakiyê kir. Piştî ewqas kes hat windakirin 86 doz hat vekirin. Di nava wan de doza yek kesî ya “Nezîr Tekçî” gihîşt sala 2025an. Lê ev doz jî paşê hat girtin. Piştî pêvajoya di sala 2013 û 2015an de xirabû gelek kes hatin kuştin. Divê berpirsiyarê wan bûyeran efûya xwe bixwaze û ji bo avakirinê her tiştî bike. Paşê heqîqet dê derkevê holê. Bîr di nava jiyanê de ye.”
Çîroka 12 kesan…
Di dawiyê denivîskar Serdar Korucu li ser mijara “Di pêvajoya pevçûnan de çavkanî” axivî. Serdar Korucu qala pirtûka xwe ya “Ew şîn xilas nabe (Bu yas bitmez)” kir. Serdar Korucu destnîşan kir ku gotina kujer di nava me de ye gelek girîng e û wiha axivî: “Dema ku min li kuçek Stenbolê dirûşmeya “Em operasyon naxwazin, qetlîam dixwazin” min bihîst min biryara pirtûkê da. Di nava pirtûke de çîroka 12 kesên ku xizmên xwe windakirine heye.”
Panel bi pirs û bersivan dawî bû.
