Amed – Cîgira Serokê Şaxa Komeleya Mafê Mirovan (ÎHD) ya Amedê Sûzan Mehmetoglû Aksoy têkildarî êrişa li ser malbata Kurd diyar kir ku ev bûyer, sedema bêtehamûliya li hember zimanê Kurdî ye û got: “Divê her kes zimanê xwe biaxive û biparêze.”
Li gorî daneyên Komeleya Mafê Mirovan (ÎHD) a meha Rêbendanê 14, sibatê 6, adarê 5, nîsanê 7, gulanê 15 û hezîranê 9 û bi giştî 56 bûyerên nijadperestiyê pêk hatinê. Ew dane heta meha Hezîranê ne. Herî dawî li Stenbolê Malbata Kaya dema ji seyranê vedigeriya, ji ber di wesayita xwe de stranên bi zimanê kurdî guhdar dikirin, ji aliyê polîsan ve wêneyên wan hatin kişandin û bi îşkenceyê hatin binçavkirin. Di binçavkirinê de Zeynep Yaman a ducanî bû, rastî êrişa polîsan hat. Polîsan pehîn li zikê Zeynep Yaman xist û li ber vê yekê Zeynep Yaman bi rêbaza sezeryanê bi lezgînî hate ameliyatkirin. Xetereya jiyanî ya pitika Yamanê didome. Cîgirê Serokê Şaxa ÎHD’a Amedê Sûzan Mehmetoglû Aksoy têkildarî êrişa li dijî malbata kurd ji Ajansa Welat (AW) re axivî.
‘Ew bûyer bêtehemûliya zimanê kurdî ye’
Cîgira Serokê Komeleya Şaxa ÎHDa Amedê Sûzan Mehmetoglû Aksoy diyar kir ku êrişa li ser malbata kurd nayê qebûlkirin û wiha axivî: “Dema malbata Kaya di vegera seyranê de stranên bi zimanê xwe guhdar dikê rastî zordariya polîsan tên. Li vir jina ku ducanî ye, jî rastî êrişê tê. Ji ber êrişê zarok îro di bin rewşa awartê de ye û rewşa wê ne baş e. Ev bûyer bêtehamûliya zimanê kurdî ye. Mafê her mirovekî heye ku bi zimanê xwe ve bijî û zimanê xwe biaxive. Gelek mînak hene ku gelê kurd rastî êrişên nijadperestiyê hatine. Mînak karkerên ku diçin Tirkiyeyê, ji ber ku bi zimanê kurdî diaxivin, rastî êrişan tên. Di Meclisê de wexta kû bi kurdî tê axaftin, mîkrofon tên girtin. Ev mînakekî herî girîng e. Li Meclisê zimanê kurdî qebûl nakin. Ew bûyer pêşengtiya nijadperestiyên din dike. Em wekî Komeleya Mafê Mirovan wan tiştan qebûl nakin.”
‘Her kes bi zimanê xwe tê naskirin’
Sûzan Mehmetoglû Aksoy destnîşan kir ku êrişên li ser zimanê kurdî bandor civakê bandor dike û wiha pê de çû: “Ez jî wekî kurdekî dixwazim zimanê xwe biaxivim. Dema ku kurd diçin bajarên li Tirkiyeyê, nikarin bi rihetî û keyfxweşî zimanê kurdî biaxivin. Gelek caran ditirsin ku zimanê xwe biaxivin. Divê her mirov zimanê xwe li her derê bi rihetî biaxivê. Divê em di her derê cîhanê de zimanê xwe biaxivin û zimanê xwe hîn bibin. Wextê ku em zimanê xwe neaxivin, di pêşerojê de zêdetir em ê rastî êrişan werin. Îro her kes bi zimanê xwe tê naskirin. Zimanê gelekî dê winda bibê, ew gel jî winda bibê.”
‘Li dijî dijadperestiyê em ê xebatên xwe bidomînin’
Sûzan Mehmetoglû Aksoy bi bîr xist ku Komeleya Mafê Mirovan dê her dem zimanê kurdî biparezê û axaftina xwe wiha bi dawî kir: “Em ê alikarî bidin kesen ku rastî nijadperestiyê hatine. Em ê li her qadê, mafê wan biparêzin. Li dijî dijadperestiyê em ê xebatên xwe berdewam bikin. Jixwe berî çend mehan, me malbatên gerîla û leşkeran anî gel hev. Kesên ku zarokên xwe winda kirine hatin li Konferansê. Ne tenê yêk alî, her du alî jî tev li konferansê bûn. Ew konferans hem ji aliyê civakê hem jî ji aliyê siyasî bû xwedî bandor. Xebatên me dê bidomin, 24’ê mehê jî em ê konferansekê li dar bixin. Em kurd in, em dixwazin bi zimanê xwe biaxivin.”
