Hikûmeta veguhêz a Sûriyeyê, piştî rapor û agahiyên ku teqez dikin çekdarên wê yên biyanî sûcên derqanûnî pêk anîne, li xwe mikur hat ku hêzên wê li Siwêdayê binpêkirinên cidî kirine.
Hikumeta veguhêz a Sûriyeyê binpêkirinên li Siwêdayê qebûl kir û bûyer wekî “tevgerên sûc û derqanûnî” bi nav kir ku di tu şert û mercan de nayê qebûlkirin. Her wiha soz da ku hemû kesên berpirsyar darizîne.
Di daxuyaniyeke fermî de hat gotin ku fermandariyê bi dilgiranî bûyerên dawîn ên li Siwêdayê şopandine û îdia kir ku binpêkirin bi vî rengî ne ji prensîbên ku dewleta Sûriyeyê li ser ava bûye.
Daxuyaniyê bi tundî sûc û kiriyarên ku li Siwêdayê qewimîne şermezar kir û pabendbûna xwe ya lêpirsîna li ser hemû bûyeran û darzandina her kesê ku sûc kiriye nîşan da. Hikumeta veguhêz a Sûriyeyê bi awayekî eşkere mikur hat ku çekdarên biyanî û ne Sûriye di nava hêzên wan yê ku êrîşî Siwêdayê kirin hene.
Ev helwesta fermî piştî wê yekê tê ku raporên mafên mirovan û yên meydanî hêzên hikûmeta veguhêz a Sûriyê bi binpêkirinên cidî li Siwêdayê tawanbar kirin, di demekê de ku bangên herêmî û navneteweyî ji bo lêpirsîneke zelal û hesabpirsîneke berfireh hewce ne.
Komîteya lêkolîna rastiyan a ku ji aliyê hikûmeta veguhêz a Sûriyeyê ve hatiye damezrandin, biryar bû ku rapora xwe ya li ser komkujiyên peravê di 10ê vê mehê de aşkere bike, piştî ku sê mehên din ji bo temamkirina lêpirsînên xwe hatin dayîn.
Zêdetirî şeş roj ji roja diyarkirî derbas bûne bêyî ku derbarê raporê de daxuyaniyek were dayîn, û sedemên neweşandina encamên lêpirsînê hîn nehatine aşkerekirin.
