Roja 10an a Mîhrîcana Çand û Hunerê ya Tetwanê bi stand-up’a Erdal Kaya û konsera Kasim Taşdogan bi dawî bû.
Mîhrîcana Çand û Hunerê ya Tetwanê ku bi dirûşma “Em rêya aştiyê bi hunera azad re dihonin” tê lidarxistin, bi stand-up’a Erdal Kaya û konsera Kasim Taşdogan berdewam kir. Stand-up û konsera ku li Qada Şahî û Konseran a li ser qeraxa Gola Wanê hat lidarxistin, rastî eleqeyeke mezin hat û bi hezaran kesan bername temaşe û guhdar kir.
Ewilî komedyenê Kurd Erdal Kaya derket ser dikê û bi henekên xwe yên ku behsa jiyana rojane ya Kurdan dike, qad da kenandin. Erdal Kaya bi tevlibûna gel saetekê li ser dikê ma û demeke xweş temaşevanan da borandin.
Dû re hunermend Kasim Taşdogan bi stranên xwe qad hem xemgîn kir hem jî kir cihê şahiyê. Dema Kasim Taşdogan stranên xwe digot, gelek caran guhdarvanan jî hevaltiya Taşdogan dikir û bi dengeke bilind stran digotin. Taşdogan, strana Xelîl Xemgîn ya bi navê “Nav Şirîna Min” di şexsê Cûma Xelîl (Bavê Teyar) de diyariyê hemû şehîdên demokrasiyê kir û guhdarvanan bi hezkirineke mezin guhdar kir. Her wiha Taşdogan bi strana “Hekîmo” guhdarvan mest kir û bi stranên floklorîk roja 10an a mîhrîcanê bi dawî bû.
