Şirnex – Li Kurdistanê çanda palehiyê neyê kirin jî lê belê li Gundikê Melê ya Şirnexê ev çand hîn berdewam dike.
Her ku teknolojî li pêş dikeve, amûrên ji bo çandiniyê tên bikaranîn jî vediguhezin û li deverên çandinî lê tê kirin çanda palehiyê jî hêdî hêdî winda dibe. Li kêm deveran be jî çanda palehî û hevkariyê berdewam dike. Her çiqas sedema berdewamiya vê çandê şertên erdnigarî be jî kesên ku palehiyê dikin bi gotinên stranan ji vê çandê kêfxweşiyê werdigirin.
Li Bajaroka Gundikê Melê ev çanda palehiyê kêm bûbe lê hê jî berdewam dike. Li bajarok hema bêje hemû şênî mirovên hev in û deverên makîneyên dirûtine-çinînê nekarin biçin nav zeviyên genim, bi hev re diçin palehiyê û alikariyê didin hev.
‘Her roj em diçûn dirûna malekê’
Xalid Sîdar yek ji şêniyê Gundikê Melê ye ku hatiye palehiyê diyar kir ku zemanê berê wan bi traktoran zevî nedirakirin û got: “Wê demê bi ga û hêstiran me genim diçand. Tu kes bi tena serê xwe nediçû dirûna xwe. Me dikir dor û her roj em diçûn dirûna malekî. Ji xwe dema hevkarî nebe karê dirûtinê jî xelas nabe.”
‘Demên berê palehî weke şahiyekê bû’
Sîdar da zanîn ku çand palehiyê winda bûye û wiha axivî: “Dema em diçûn palehiyê weke şahiyekê em diçûn, stranên bêrîte, stranên palehiyê dihatin gotin. Em niha hatine dirûna apekî min, bi tena serê xwe ye û diçe ber sewalên xwe. Ji ber em kombûn û me got em dirûna wî bikin. Niha ev çand winda bûye û ciwan kare dirûtinê nizanin.”
Piştî dirûna zeviyên genim îja dora patozê ye û dema patozê jî şêniyên bajarokê bi alîkariya hev dikin û karên xwe yên çandiniyê diqedînin.
