HPGê têkildarê mirina Serhat Ceylan ê ku dihate îdiakirin hatiye kuştin daxuyanî da û ragihand ku ji ber pirsgirêka tenduristiyê jiyana xwe ji dest daye.
Li navçeya Bazîd a Agirî, di çapemeniya herêmî de hatibû îdiakirin ku Serhat Ceylan ji aliyê PKKê ve hatiye kuştin.
HPGê têkildarê mijarê daxuyanî da. Di daxuyaniya ku di Ajansa Nûçeyan a Firatê de cih girtî, wiha hate gotin: “Welatparêzê qedirbilind Serhat Ceylan ê ji navçeya Bazîd a Agiriyê weke mêvan hatiye cem hêzên me. Lê belê di pêvajoya ku li ba me bû, ji ber guhertina şert û mercên hewayê hin nexweşiyên wî yên berê lê giran bûye û tevî hemû hewldanan nekariye bê rizgarkirin û jiyana xwe ji dest daye. Ji ber Serhat Ceylan di nava xebatên welatparêziyê de jiyana xwe ji dest da em wî weke şehîdê Tevgera Azadiya Kurdistanê qebûl dikin û xemgîniya xwe parve dikin. Em ji malbata welatparêz şehîd Serhat Ceylan, xizmên wî yên nêz û hemû gelê Bazîdê yê welatparêz re sersaxiyê dixwazin.”
Ceylan demekê hevserokatiya Partiya Demokratîk a Gelan (HDP) ya navçeyê kir û endamê Meclisa Bajêr a Giştî bû.
