Nûçegihana MAyê Zeynep Durgut ku piştî gefên xizmên Kenan Tatar li edliyeya Cizirê giliyê sûc kir. Zeynep Durgut anî ziman ku ew ê li dijî gefan bêdeng nemîne û got: “Kamera û mîkrofona min di destê min de ye. Em ê hertim li pey heqîqetê bin.”
Nûçegihana Ajansa Mezopotamyayê (MA) Zeynep Durgut ji ber nûçeya, “Çeteya fihûşê” rastî gefa xizmên Kenan Tatar hat. Piştî gefê Zeynep Durgut li Edliyeya Cizîrê giliyê sûc kir. Zeynep Durgut piştî serlêdanê li ber edliyeyê daxuyanî da. Tevgera Jinên Azad (TJA), rêxistinên Partiya Herêmên Demokratik (DBP) û Partiya Wekhevî û Demokrasiyê ya Gelan (DEM Partî) ên Şirnex û navçeyên wê jî tevlî daxuyaniyê bûn.
Di destpêke de endama TJA Berîvan Kutlu axivî û wiha got: “Em gefa li hevala me hatiye xwarin şermezar dikin. Hevala me ya rojnameger karê xwe kiriye. Em vê yekê qebûl nakin. Em ê li dijî van gefan li ber xwe bidin û doza fihûşê hatiye vekirin jî bişopînin. Divê dozger jî kesên gef xwarine bigirin û ceza bikin. Tiştek were serê hevala me ew berpirsyarin.”
‘Em ê hertim li pey heqîqete bin’
Piştî Zeynep Durgut bi parêzerê xwe re giliyê sûc kir li ber edliyeyê axivî û wiha got: “Çi êriş û polîtikayên qirêj li vê herême tê kirin em dişopînin û aşkere dikin. Dosyaya fihûşê ku 13 sal berê hatibû vekirin me weke dosya weşand û ew nûçe jî li her derê belav bû. Çapemeniya Azad tu car serî netewand. Tevî kuştin, girtin û binçavkirinan jî serî netewand. Ez ê jî serî netewînim. Kamera û mîkrofona min di destê min de ye. Em ê hertim li pey heqîqetê bin.”
KESK Şaxa Şirnexê ji bo Zeynep Durgut daxuyaniyeke niviskî da û ev tişt parve kir: “Zeynep Durgut ji ber nûçeyên xwe rastî gefan hatiye. Em gef xwarina li rojnamegerên Çapemeniya Azad qebûl nakin.”
Daxuyanî bi dirûşmeya, “Çapemeniya Azad nayê bêdengkirin” bı dawî bû.
