Nobeta Platforma Têkoşîna Li Dijî Hişbirê ya Şiyar Be di roja 4an de didome. Hevşaredara Rezanê Leyla Ayaz wiha axivî: “Divê ku em xwedî li hemû ciwanan derbikevin.”
Têkoşîna Li Dijî Hişbirê ya Şiyar Be bi dirûşmeya “Em tarîtiyê ronî dikin” li Parka Koşûyolû ya navçeya Rezana Amedê kon veda û nobeta kon di roja 4an de didome. Hevserok û endamên Komeleya Dîcle û Firatê (DFG), Hevserok û endamên Partiya Wekhevî û Demokratîk a Gelan (DEM Partî) ên Amedê, Hevşaredara Rezanê ya Amedê Leyla Ayaz û endamên meclisê, TÛAY-DER, Komeleya Alîkarî û Civakî ya Alimên Amedê, nûnerên sazî, dezgehên sivîl û gelek welatî beşdarî çalakiya nobetê bûn. Kesên ku beşdarî çalakiya nobetê bûn formayên çalakiyê li xwe kirin û govend gerandin. Piştre li ber kon rûniştin û dest bi nobetê kirin.
Hevseroka Komeleya Dîcle û Firatê (DFG) Kesîre Onen ewilî axivî û got: “Vê meseleyê hemû civakê eleqedar dike. Divê ku têkoşîn û çalakiyên bi vî awayî mirov ji gel re vebêje, ji ber ku pêdivîya hemû civakê bi çalakiyên wisa heye. Em ê jî hem bibin şopînerê bûyerên bi vî awayî û hem jî tev li bibin.”
‘Tişta bikeve ser milê me em ê bikin’
Piştre Hevseroka DEM Partiyê ya Amedê Gulşen Ozer axivî û anî ziman ku ew ê ji bo ciwanan tişta ji destê wan bê bikin û got: “Em zanin ev xebatên heyî têr nakin, lê ev jî hişyarkirineke. Lewre di her serdemê de ciwan dibin xetereyan de ne. Lê îro ciwanên vî bajarî hê zêdetir dibin xetereyan de ne. Ciwan, tenduristî, aborî û pêşeroja wan jî tê tunekirin. Ev rewşa hanê bandorê li malbatên wan jî dike. Bila malbatên me jî li vir bi me re nobetê bigirin. Divê em û malbatan dest bidin destê hev ciwanan ji vê rewşê derxin.Tişta bikeve ser milê me em ê bikin.”
‘Pergal dixwaze civakê bêhiş bihêle’
Serokê Komeleya Alîkarî û Civakî yê Alimên Amedê Mahmût Şik jî diyar kir ku pergal dixwaze vê civakê bêhiş bihêle û wiha got: “Xwedê di ayetên xwe de me hişyar kiriye, Ji ber ku mirov tiştên nebaş dike hatiye qedexekirin. Pergalê jî maddeyên bi vî awayî bi zanebûn kirin nava civakê û ciwanan xirab kir. Pergala heyî ji civaka me re xisar e. Ev tişt ji bo berjewendiyên xwe bikar tînin û difiroşin ciwanan. Tişta ku pergal ji me dixwaze em bêhiş bibin û civaka me bêsinc bê hiştin.”
‘Bila ciwanên me ji dest neçin’
Hevşaredara Rezanê Leyla Ayaz jî wiha axivî: “Armanca pergalê ew e ku li vî welatî polîtîkayên şerê taybet zêde bike û hemû ciwanan ji rê derxe. Divê ku em xwedî li hemû ciwanan derbikevin. Da ku ciwanên me ji dest neçin.”
Nobet dê her şev li navçeyên Amedê dê bi dorê bidome.
