Hevserokê DEM Partiyê yê Giştî Tûncer Bakirhan ku li Amedê serdana partiyên siyasî kir, bal kişand ser êrişa Îsraîlê ya li dijî Îranê û got: “Divê Îran meseleyên xwe yên navxweyî bi awayekî demokratîk, çareser bike. Heke cudahiyên li welatê xwe înkar bike, dê ji mudaxileyan re vekirî be.”
Hevserokê Partiya Wekhevî û Demokrasiyê ya Gelan (DEM Partî) Tûncer Bakirhan li Amedê serdana partiyên Kurdistanî kir. Hevberdevkên Înîsiyatîfa Yekitiya Demokratîk Gulcan Kaçmaz Sayyîgît û Mehmet Kamaç, Cîgira Hevserokên Giştî ya ji Komîsyona Têkiliyên Partiyên Siyasî û Saziyên Sivîl Berpirsyar Ozlem Gunguz jî bi Tûncer Bakirhan re serdana partiyan kirin.
‘Hevdîtin ji bo misogerkirina Kurdan girîng in’
Hevserokê PÎAyê Ahmet Kaya, Hevseroka PÎAyê ya Amedê Banû Ay û rêveberên partiyê Bakirhan û kesên pê re pêşwazî kirin. Di hevdîtinê de ewilî Hevberdevka Înîsiyatîfa Yekîtiya Demokratîk Gulcan Kaçmaz Sayyigit diyar kir ku ev hevdîtin ji bo misogerkirina yekîtiya Kurdan girîng in û ji bo wê dane destpêkirin.
‘Birêz Ocalan qiymetê dide fikren partiyên Kurdistanî’
Tûncer Bakirhan anî ziman ku di çarçoveya pêvajoyê de ew serdana partiyên siyasî dikin û wiha got: “Ji bo em rexne, pêşniyar û fikrên partiyên xwe kom bikin, me ev serdan pêk anî. Ji xwe Birêz Ocalan bi taybetî bal dikişand ser ku ew qiymetê dide fikrên partiyên Kurdistanî û ji me xwest ku em bi baldarî li rexne û pêşniyarên wan ên li ser vê pêvajoyê guhdarî bikin û notan bigirin. Di serdana me ya din de xwest ku em li ser bingeha van hevdîtinan wî agahdar bikin. Me jî dest bi van serdanan kir. Partiyên me xwedî fikir û ramanên xwe ne. Ev pêvajo ne tenê ya ku di navbera DEM Partî û AKP’ê de tê meşandin e. Civaka demokratîk temsîla 86 mîlyon mirovî dike; ev têgihiştineke wiha nîşan dide ku heke were fêhmkirin 86 milyon kes li ser zemîneke demokratîk weke hemwelatiyên wekhev dikarin bêhnê bistînin û ji bo vê jî ev mesele me hemûyan eleqedar dike.”
Bakirhan da zanîn ku PÎA jî parçeyek ji pêvajoya nû ye û got, “Bi pêvajoyeke ewçend girîng a li ber dest re, fikrên PÎAyê ji bo me girîng in. Em ji bo vê armancê hatin, hêvîdar im wê hevdîtineke baş be.” Dû re Hevserokê Giştî yê PÎAyê Ahmet Kaya diyar kir ku ev serdan girîng e û dê piştgiriyê bidin pêvajoyê.
Bakirhan piştre bersiv da pirsên rojnamevanan. Bakirhan bersiv da pirsa li ser daxwaza Abdullah Ocalan a hevdîtina bi lîderên Kurd ên mîna Mesûd Barzanî û Celal Talabanî re.
‘Birêz Ocalan girîngiyeke mezin dide yekitiya neteweyî ya Kurdan’
Bakirhan diyar kir ku Abdullah Ocalan girîngiyeke mezin dide yekitiya neteweyî ya Kurd û got, “Em qala lîderekî siyasî dikin ku ji salên 1990î û vir ve gelek bangên yekitiya neteweyî ya demokratîk kiriye û banga kongreya neteweyî kiriye. Ez hêvî dikim ku di demên pêş de birêz Ocalan jî derbarê pêvajoya berdewam dike bi rêberên kurdan re dan û stendina nêrînan bike. Ew ê pêşniyarên wan bistîne. Ev gelekî hêja û girîng e. Weke DEM Partî em di wê baweriyê de ne ku ev hevdîtin wê tevkariyeke girîng bike û divê pêk were.”
‘Divê Îran meseleyên xwe bi rêyên demokratîk çareser bike’
Bakirhan derbarê êrişa Îsraîlê ya li dijî Îranê de jî ev tişt gotin: “Em li dijî polîtîkayên êrişkar ên Îsraîlê ne. Rayagiştî baş dizane ku li dijî zilma Îsraîlê ya li Xezayê em li ku disekinin. Li pêşiya Îranê du rê hene. Bingeha Îranê ya niha bang dike ku mudaxileyê wê bê kirin. Divê Îran meseleyên xwe yên navxweyî bi awayekî demokratîk, mekanîzmayeke rast, hewldanên rast demildest çareser bike. Heke ku di feraseta yekperest de israr bilke û cudahiyên li welatê xwe tune dihesibîne dê ji mudaxeleyan re vekirî be. Îro Îsraîlê êriş kir sibê dê dewleteke din a emperyalîst êriş bike. Rêya herî baş ku rê li pêş mudaxeleyê bigire demokratîkbûn e. Divê Îran jî meseleyên xwe bi rêyên demokratîk çareser bike.”
Civînê piştre ji çapemeniyê re girtî dewam kir. Bakirhan û hevalên wî pişt re Komeleya Kurd a Demokrat a Şoreşger (DDKD) ziyaret kirin. Rêveberên DDKDê şande pêşwazî kirin. Mehmet Kamaç li vir axivî û bal kişand ser yekitiya Kurdan. Kamaç diyar kir ku ew ê di 26’ê Tîrmehê de li Bazîdê û di destpêka meha Cotmehê de jî li Mêrdinê konferansekê li dar bixin.
Hevdîtinê ji çapemeniyê re girtî dewam kir
Bakirhan û şandeya DEM Partiyê pişt re serdana Partiya Komunîst a Kurdistanê (KKP), Partiya Sosyalîst a Kurdistanê (PSK) û Partiya Azadiyê kirin. Di van serdanan de jî rêveberên partiyan şandeya DEM Partiyê pêşwazî kir û civînê ji çapemeniyê re girtî berdewam kirin.
