Fermandarê SDG’yî yo Pêroyî Mazlum Ebdîyî va ke koalîsyonê mîyanneteweyî seba adirbestê pêroyî Tirkîye reyde qisey keno. Ebdîyî reyna dîyar kerd ke HTŞ’yî verê hêrişî ra mesaj erşawito ke do SDG’yî nêkero hedef û Rusya zî înan ra waşto ke hetkarî bikerê.
SMO ke Tirkîye piştî dano ci hêrişê SDG’yî kerd û dima trafikê dîplomasî mabênê Washington û Anqara de hîra bî.
Na çarçewa de Wezîrê Karê Teberî yê DYA’yî Antony Blinken Anqara de bi Serekkomar Recep Tayyîp Erdoganî reyde pêvînayîş kerd û Fermandarê SDG’yî yo Pêroyî Mazlum Ebdîyî zî derheqê mesela de qisey kerd.
Ebdî ke televizyonê Ronahî de qisey kerd va ma têkoşînê çekan ra dûrî yê û fikirîyayî ke keso ke cayê xo ra ameyo berdene ganî agêro cayê xo. Ebdîyî dewam kerd û va: “Efrînijî ganî agêrê cayê xo. Kesê ke Efrîn de ca girewtê teber ra ameyî û tayê agêrayî cayê xo. Efrîn nika veng beno, Efrînijî ganî agêrê cayê xo. No xo bi xo nêbeno, ganî bi peymanan bibo. Serêkanî û Girê Sipî de wextê ci ameyo ke şar agêro cayê xo. Seba naye ganî qiseykerdiş bibo. Problemî ganî bi dîyalogî bêrê safîkerdene nêke bi şerî.”
Ebdî qiseyanê xo wina qedênayî: “Ma SDG sey hêzêkê serekeyî yê Sûrîye yê. Tirkîye ganî êdî naye bivîno. Ma unsurê eslî yê nê cayanê xo yê. Ma cayê xo de yê. Her ca de şer qedîyayo, teyna Tirkîya û grûbê ke a piştî dana înan şer kenê.”
