Amed – Dayikên ku li Amedê tev li bîranîna damezrînerên PKKê Alî Haydar Kaytan û Riza Altûn bûn diyar kirin ku bi şehadeta wan xemgîn in û xwestin demildest aştî pêk were.
Partiya Karkerên Kurdistanê (PKK) di 12ê Gulanê de encamnameya kongreya xwe ya 12emîn eşkere kir û şehadeta du pêşeng û damezrînerên xwe Alî Haydar Kaytan û Riza Altûn ragihand. Kongre diyarî Alî Haydar Kaytan û Riza Altûn kirin. Piştî daxuyaniya PKKê li gelek bajaran Alî Haydar Kaytan û Riza Altûn hatin bibîranîn. Li Amedê jî bi pêşengtiya MEBYA-DER, DEM Partî û DBPê bi tev li bûna hezaran kesan pêşengên PKKê li Qada Şêx Seîd hatin bibîranîn. Bi hezaran kes tev li bîranînê bûn. Welatiyên ku tev li bîranînê bûn ji Ajansa Welat (AW) re axivîn.
‘Em gelek xemgîn in’
Dayika bi navê Sadîke Akdag da zanîn ku ji bo bîranînê ji Mersînê hatiye û wiha axivî: “Em îro ji bo her du pêşengan li vir in. Ez gelek xemgîn bûm, ew salên dirêj têdikoşiyan. Em dixwazin di nava aştî û wekheviyê de bijîn. Em dixwazin girtîgeh vala bibin.”
‘Divê dewlet jî zelal be’
Dayîka bi navê Aycan Metîn jî diyar kir ku ew êdî şer naxwazin û wiha got: “Ez dixwazim êdî aştî were. Bila dayîkên gerîla û leşkeran negirîn. Êdî bes e, bila me nexapînin. Ez dixwazim Serokê me azad bibe, tevahiya girtîgehan vala bibin. Daxwaza me zelal e divê dewlet jî zelal bibe. Armanca me rawestandina şer e. Em mafê zimanê xwe û azadiya xwe dixwazin. Baweriya me bi dewletê nayê. Ji bo baweriya me were divê girtîgeh vala bibin, zimanê Kurdî bibe zimanê fermî.”
‘Em dixwazin Serokê me azad bibe’
Dayîka bi navê Hediyê Yilmaz jî destnîşan kir ku ew ji Mersînê ji bo aştiyê hatiye bîranînê û wiha axivî: “Em gelek xemgîn in. Xwedê heqê wan li erdê nehelê. Em îro ji bo tevahiya girtiyan li vir in. Em dixwazin deriyê girtîgehan vala bibe. Em dixwazin Serokê me azad bibe.”
‘Bila êdî tu kes neyê kuştin’
Dayîka bi navê Zêrin Ateş jî diyar kir ku ji Silopiyayê hatiye bîranînê û wiha got: “Em dibêjin êdî bes e. Bila êdî tu kes neyê kuştin. Îro girtîgeh tejî ne. Em dixwazin girtî tevahî bên berdan.”
