Di danişîna ewil a doza stranbêj Pinar Aydinlar de ku di çarçoveya lêpirsîna li dijî HDKê de hatibû girtin, biryara tehliyeyê hate dayîn.
Danişîna ewil a doza stranbêj Pinar Aydinlar ku di çarçoveya lêpirsîna li dijî Kongreya Demokratîk a Gelan (HDK) de hatibû girtin û bi îdiayên “endamtiya rêxistinê” û “propagandaya rêxistinê” tê darizandin, li 13emîn Dadgeha Cezayên Giran a Edliyeya Çaglayana Stenbolê hate lidarxistin. Pinar Aydinlar û parêzerên wê di danişînê de amade bûn. Her wiha Hevberdevkê HDK’ê Alî Kenanoglû û gelek siyasetmedar, rewşenbîr û parêzvanên mafên mirovan jî doz şopandin. Danişîn, bi tespîtkirina nasnameyan dest pê kir.
Pinar Aydinlar parastina xwe kir û tawanbariyên li ser xwe red kir û xwest were tehliyekirin û beraetkirin.
Piştre jî dozgeriyê mutalaya xwe da dadger û xwest Pinar Aydinlar were berdan.
Parêzer Mûrat Aksak jî parastinê kir û xwest miwekîla wî were berdan û beraetkirin.
Dadgehê jî piştî parastinan biryara tehliyeyê ji bo Pinar Aydinlar da. Her wiha dadgehê biryara tevdîra kontrola edlî da û ji bo mutala bê amadekirin, danişîna dozê taloqî 11ê Îlonê kir.
