Serokê YNKê Bafil Celal Talabanî bi peyamekê piştgirî da encama Kongreya 12emîn a PKKê û got: “Me barê serxistina pêvajoya aştiyê hilgirt. Îro jî em ê hewldanên serxistina vê gava dîrokî hildin ser milê xwe.”
Serokê Yekîtiya Niştîmaniya Kurdistanê (YNK) Bafil Celal Talabanî têkildarî encama Kongreya 12emîn a PKKê peyamek belav kir.
Bafil bal kişand ser biryara di kongreya 12emîn a PKKê de derketî û got: “Biryara PKKê ya bersivdayîna banga Birêz Abdullah Ocalan, xwe fesîhkirin û çekdanînê di vê qonaxa hestiyar de gaveke dîrokî ye û em piştgiriyê dike.”
Bafil Talabanî destnîşan kir ku Yekîtiya Nîştimaniya Kurdistanê weke berê dixwaze pêvajoya aştiyê serbikeve û wiha got: “Em alîkar û piştevanê hemû aliyanin ji bo serxistina hewldanên tên dayîn. Li gorî nêrîna min çekdanîn beşek ya pêvajoyê ye, lê divê ji bo serxistina beşên din jî gavên bên avêtin.
Gavên me yên stratejîk ên nîştimanî li ser şopa Serok Mam Celal dimeşin ku weke yekemîn serok, barê serxistina pêvajoya aştiyê hilgirt. Îro jî em ê hewldanên serxistina vê gava dîrokî hildin ser milê xwe.”
Serokê YNKê Bafil Talabanî diyar kir ku tenê çareserkirina pirsgirêka kurd bi rêya aştiyê, dikare aramiya Rojhilata Navîn misoger bike.
Herî dawî Talabanî ev got: “Hêvîdarim ku pêvajoya aştiyê li Bakurê Kurdistan û Tirkiye bi ser bikeve, ji bo rûpelek nû ya siyasî û dîplomasî di navbera aliyan de vebe. Gav ji bo xebatên hevpar bên avêtin. Wê ev yek jî bandorê li tevahî Kurdistanê bike.”
