Amed – Hevberdevkê Komîsyona Rêxistinkirinê ya DBPê Huseyîn Bîrlîk têkildarî kampanyaya partiya xwe ya seferberiyê axivî û diyar kir ku dê di çarçoveya “Banga Aştî û Civakî Demokratîk” ya Rêberê Gelê Kurd Abdullah Ocalan de civakê bi rêxistin bikin.
Partiya Herêman a Demokratîk (DBP) civîna Meclisa xwe ya Partiyê (PM) di 13ê Nîsanê de li Amedê li dar xistibû û encamnameya wê jî di 16 Nîsanê de bi raya giştî re parvekiribû. DBPê di encamnameya xwe de diyar kiribû ku dê di meha Gulanê de di çarçoveya “Banga Aştî û Civaka Demokratîk” a Rêberê Gelê Kurd Abdullah Ocalan de xebatên xwe bimeşîne û civakê bi rêxistin bike. Hevberdevkê Komîsyona Rêxistinkirinê ya DBPê Huseyîn Bîrlîk têkildarî kampanyaya partiya xwe ya seferberiyê ji ajansa me re axivî.
‘Mîsyona me ya esasî rêxistinkirina civakê ye’
Huseyîn Bîrlîk da zanîn ku rol û misyona partiya wan a esasî rêxistinkirin û perwerdekirina civakê ye û wiha got: “Bangawaziya birêz Abdullah Ocalan di 27ê Sibatê de hate kirin. Divê em bingeha civaka demokratîk ava bikin. Meclis û komunên wê ava bikin. Ji ber wê yekê em van weke erka xwe ya esasî dibînin. Pêdiviya rêxistinkirinê ew e ku em civakeke demokratîk ava bikin. Saziyên xwe ji nû ve ava bikin. Komîsyon û komunên gundan, taxan û bajaran em ava bikin. Di esasê xwe de ev pêngav e, pêngava me ya duyemîn e. Par di meha îlonê de me ji bo ku em xwe bi rêxistin bikin konferanseke mezin li dar xistibû. Di encama 6 mehan de gelek plansaziyên ku me danîn pêşiya xwe, me bi cih anîn. Li gundan, taxan, bajaran, malan me civînên gel pêk anîn. Me rewşa heyî bi hev re nirxand.”
‘Em dixwazin gelê xwe ji vê pêvajoyê re amade bikin’
Huseyîn Bîrlîk bi bîr xist ku civîna Meclisa xwe ya Partiyê di 13ê Nîsanê de li Amedê li dar xistibûn û wiha domand: “Li wê derê me banga rêzdar Abdullah Ocalan a ‘Aştî û Civaka Demokratîk’ esas girt. Em li ser sekinîn ku em ê vê bangê bi çi rê û rebazan bi cih bînin û mayînde bikin. Di encamnameya me de jî seferberi hate îlankirin. Ji xwe bingehê partiya me avakirina civakeke demokratîk e. Hêzên hegemon dixwazin Rojhilata Navîn ji nû ve dizayn bikin. Em jî weke partî di vê merheleyê de dixwazin gelê xwe û gelê Rojhilata Navîn û gelê ku li ser vê erdnîgariyê dijîn, ji vê pêvajoyê re amade bikin. Da ku em destkeftiyên xwe xurt û mayînde bikin. Gel û pergala herî bi rêxistinkirî dê serbikeve. Em weke DBP dixwazin hem bi piştgiriya gelê xwe hem jî bi xebatkarên xwe li tevahiya bakurê Kurdistan û bajarên Tirkiyeyê banga birêz Abdullah Ocalan bigihînin armanca wê.”
‘Em ê li gundan komunên xwe ava bikin’
Huseyîn Bîrlîk têkildarî xebatên xwe yên seferberiya rêxistinkirinê jî ev tişt gotin: “Li taxan hem komîsyon hem meclis hatine avakirin. Hem li gundan dîsa komun hatine avakirin. Kar û xebat wê bêtir li ser rêxistinkirina civakê bimeşin. Ji ber wê çendê heke em bêjin divê em demokrasiyê mayînde bikin. Demokrasî jî bingeha xwe ji rêxistinkirina gel distîne. Wê li hemû bajaran hem bi serdanên hevserokên me yên giştî, hem bi saziyên me yên sivîl re dê civîn werin lidarxistin. Li her tax, bajar û kolanan em ê civînên gel li dar bixin. Em ê rewşa me ya siyasî, rewşa Rojhilata Navîn, polîtîkayên me çi ne, em ê çawa bikaribin di vê merheleyê de serbikevin nîqaş bikin.”
Kampanyaya rêxistinkirinê di meha Gulanê de dest pê dike
Huseyîn Bîrlîk da zanîn ku dê kampanyaya xwe ya rêxistinkirinê bi dirûşma “Ji kolanan heta taxan, ji taxan heta bajaran em ê azadiyê rêxistin bikin” di meha Gulanê de bidin destpêkirin û wiha dirêjî da axaftina xwe: “Em ê li ser vê esasê xebatên xwe bidin destpêkirin. Hem Meclisa me ya Partiyê, hem rêveberiya me ya navendî, hem hevserokên giştî yên partiyê û saziyên me yên sivîl em ê li taxan, gundan, bajaran bernameyan çêbikin, em ê hevdîtinên gel pêk bînin. Me li ser esasê em ê çawa hêz bidin vê pêvajoyê ev pêngav daye destpêkirin. Bi meha Gulanê re em ê dîsa li nav gelê xwe bin û kar û xebatên xwe bimeşînin.”
‘Ji çareserkirina vê meseleyê ditirsin’
Huseyîn Bîrlîk têkildarî gavneavêtina dewletê ya derbarê pêvajoya heyî de ev tişt gotin: “Amadekariyeke dewletê ya têkildarî çareserkirina pirsgirêka kurd nîne. Banga birêz Abdullah Ocalan di rayagiştî ya navnetewî de jî deng veda. Gelek dewletan jî erênî dît û xwestin gavên demokratîk bên avêtin. Lê hikûmeta Tirkiyeyê û rayedarên dewletê gav neavêtin. Ji ber ku ji çareserkirina vê meseleyê ditirsin. Hesabên wan li ser hilbijartinê hene. Dixwazin li gorî xwe vê pêvajoyê bi rê ve bibin. Ev yek jî tişteke neyînî ye nabe. Heta ku li ser bingeha demokrasiyê mesele neyê çareserkirin maf neyê naskirin wê ew pergal mayînde nemîne.”
15ê Gulanê dê bi aktîvîteyên cur bi cur pîroz bikin
Huseyîn Bîrlîk bal kişand ser xebatên wan ên têkildarî 15ê Gulanê Cejna Zimanê Kurdî û wiha pê de çû: “Bi hevkariya saziyên ku bi ziman re eleqedar dibin bername hatine çêkirin. Weke şahî, panel, sempozyûm, dîwana dengbêjan em ê bi aktîvîteyên cûr bi cûr vê rojê pêşwazî bikin. Divê em xwedî li zimanê ku bi polîtîkayên bişaftinê re rûbirû ye derkevin. Lijneyek hatiye avakirin em jî di nav de ne. Li Amed, Cizîr, Êlih, Sêrt û Wanê weke navendî dê panel, şahî, gotûbêj û çalakiyên cur bi cur ên weke meş û daxuyaniyan bên lidarxistin. Em jî dê bi hemû rêxistinên xwe ve di 15ê Gulanê de hêz bidin ku zimanê kurdî bi pêş bixin û ji bo ku ji hêla fermiyetê ve jî cihê xwe bigire em ê têbikoşin.”
‘Em gelê xwe vedixwînin ku tev li pêvajoyê bibin’
Huseyîn Bîrlîk di dawiya axaftina xwe de ev tişt gotin: “Banga civaka demokratîk ne tenê ji bo gelê Kurd e. Dema em behsa demokrasiyê dikin ji her kesê re dixwazin. Banga me ji hemû gelên ku li Kurdistanê dijîn û kesên azadî, demokrasî û wekheviyê dixwazin re heye. Heke ji banga birêz Abdullah Ocalan re piştgiriyek hebe dê serkeftin pêk were. Banga me ji hemû gelê me re heye ku xwedî li vê bangê derkevin. Bi xwedî derketina vê bangê dê pirsgirêka Kurd jî çareser bibe. Ev yek jî dê ji bo aramiya Kurdistan, Tirkiye, Rojhilata Navîn û cîhanê bibe firsendeke baş. Em ji gelê xwe dixwazin tev li kar û xebat û aktîvîteyên partiya me bin. Em gelê xwe vedixwînin ku tev li vê pêvajoyê bibin.”
