Stenbol – Hevserokê Giştî yê DEM Partiyê Tûncer Bakirhan ku li ber nexweşxaneyê axivî, anî ziman ku Sirri Sureyya Onder gelek kotûkêş derbas kirine û bi lêv kir ku ew bi hevî ne ku Sirri Sureya Onder bi keseyetiya xwe ya berxwedêr û têkoşêr dê vê kotûkêşê jî derbas bike.
Endamê Şandeya Partiya Wekhevî û Demokrasiyê ya Gelan (DEM Partî) Sirri Sureyya Onder ku qirîza dil derbas kir 2 roj in li nexweşxaneyeke taybet a li Stenbolê tê dermankirin. Sirri Sureyya Onder ji duh ve di beşa lêneherîna awarte de ye û rewşa wî ya xeternek berdewam dike. DEM Partiyê jî derbarê rewşa Sirri Sureyya Onder de li ber nexweşxaneyê daxuyanî da. Hevserokên Giştî yên DEM Partiyê Tulay Hatîmogûllari û Tûncer Bakirhan, Hevserokê Giştî yê Partiya Herêmên Demokratîk (DBP) Keskîn Bayindir, Hevberdevkên Kongreya Demokratîk a Gelan (HDK) Meral Daniş Beştaş û Alî Kenanoglû û parlamenterên DEM Partiyê tev li daxuyaniyê bûn.
‘Em bawer in ku dê Sirri Sureya Onder vê jî derbas bike’
Di daxuyaniyê de Tûncer Bakirhan axivî û bi lêv kir ku Serokên hemû partiyan li wan geriya ne, rewşa Sirri Sureya Onder pirsînê, hatine nexweşxaneyê û ji ber wê jî ew spasiya xwe pêşkeşî wan dikin. Tuncer Bakirhan diyar kir ku ew jî agahiyan ji rêveberiya nexweşxaneyê digirin û wiha got: “Sirri Sureyya Onder merivekî berxwedêr e. Bi salan e têkoşîna aştiyê û demokrasiyê dide. Gelek kotûkêş derbas kirin. Em bawer in wê vê jî derbas bike. Li ber xwe dide û têdikoşe. Em jî bi hevî ne berxwedan û têkoşîna wî bibe sedem ku ji vê rewşe xilas bibe û dîsa têkoşîna aştiyê bidomîne. Bijîşkan jî got her roj ber bi baş bû ne vê diçe. Bijîşkên herî baş lêdinirin. Em hêvî dikin ev xwedî derketina Sirri Sureya Onder bibe xwedî derketina aştiya ku wî canê xwe ji bo wê daniye holê.”
