Amed – Yek ji jêhatî û hosteyê rocka Kurdî Harûn Elkî ku solîstê Grûb Avnayê ye derheqê avakirina Avnayê û Koma Rewşen û rocka Kurdî de ji Ajansa Welat re axivî û got: “Rocka Kurdî weke avokadoyê ye.”
Rocka Kurdî di şert û mercên îro de her çiqas ku di hêla stranbêjan de roj bi roj dewlementir bibe jî bi salan e ku di konser, festîval, Newroz, pîrozbahiyan de hema bêje qet û qet xuya nakin. Bêguman ev yek ne bi daxwaz û xwestekên wan pêk tê, organizasyonên tên hazirkirin qet berê xwe nadin van stranbêjên ku bi şêweyên rojavayî mûzîka xwe diafirînin. Ji ber wê ye ku gelek mûzîkjênên Kurd ên ku bixwazin bi şêweya rock, blues, cazz, heavy metal, punk û hwd. derkevin ser dikê jî bi hêviyekê dest pê dikin lê piştre ji ber bê îmkaniyan berê xwe didin mûzîka çandî ango klasîk. Ev yek jî rê li ber tamên cuda yên mûzîkê digre û bi xwe re yektîp û yekrengiyekê tîne.
Bêguman stranbêjên rockê yên wek Koma Rewşen, Siya Şevê, Ferec û hwd di terz, ziman û sekna xwe de ji 20 salan zêdetir e ku israr dikin û bi wê bingeha Koma Wetan hewl didin deng û stranên xwe belav bikin, didomînin.
Piştî salên duv û dirêj û dawiya dawî îsal me bihîst ku dê dengê Harûn Elkî ango Koma Avnayê li qada Newroza Amedê bilind bibe. Her çiqas ku di navbera gel de pirsên wek “Gelo Avna kê ye, kî ne” hatin kirin jî lê dema ku bihîstin yek ji endamê rocka Kurdî û Koma Rewşen e, bi kêfxweşî pêşazî lê kirin.
Piştî me bihîst ku Avna (Harûn Elkî) tê Amedê, em wek Ajansa Welat bi lez û bez çûn gel wan û me xwest hîn bibin ka di tûrê wan de çi heye. Solîstê Avnayê Harûn Elkî li ser navê koma xwe axivî. Em bi Harûn Elkî re derheqê Koma Rewşen, Harûn Elkî û heta Avnayê hem rêwîtiya Harûn û hem jî avakirina Avnayê û her wiha rewşa rocka Kurdî de axivîn. Harûn Elkî rocka Kurdî ango muzîka rocka Kurdî şiband avokadoyê û got: “Rocka Kurdî weke avokadoyê ye.”
Her wiha Harûn Elkî bal kişand ser pêvajo û serdema gelê Kurd têde derbas dibin û ew dibêje ji bo azadî û aştiyê hewcehî bi vê pêvajoyê hebû û baweriya Kurdan bi xwe heye û lewma ev pêvajo hat destpêkirin.
