Bi deh hezaran Kurd û dostên Kurdan li navçeya Germencik, Bodrûm û Qada Gundogdu ya Îzmirê kom bûn û Newroz pîroz kirin. Kesên beşdarî Newrozê bûn peyama “Bila Abdullah Ocalan azad bibe” dan.
Îro li 10 navendan cejna Newrozê bi dirûşmeya “Rêbertiya Azad Civaka Demokratîk” û “Ji bo Azadiyê Civaka Demokratîk” hat pîrozkirin. Her qad û navenda ku bi deh hezaran kes beşdar bûn daxwaza azadiya Rêberê Gelê Kurd Abdullah Ocalan anîn ziman. Li navçeyên Germencik a Aydinê û Bodrûma Muglayê jî bi deh hezaran kesên li dora agir kom bûn, bi coşek mezin Newroz pîroz kirin.
Aydin-Germencik
Li taxa Ortaklar a Germencika Aydinê bi pêşengiya Tevgera Jinên Azad (TJA), (DBP û DEM Partiyê, bi tevlîbûna bi hezaran kesî Newroz hat pîrozkirin. Siyasetmedar û parlamenter tevlî pîrozbahiyê bûn. Jin bi cil û bergên xwe yên gelekî beşdarî pîrozbahiyê bûn. Piştî rezgirtinê bernameya pîrozbahiyê destpêkiri. Hevserokên DEM Partiyê yê Germencikê Newroza gel pîroz kir. Parlamenter Sirri Sakik axivî û bal kişand ser peyama Rêberê Gelê Kurd Abdullah Ocalan, banga xwedî li derketina peyamê kir. Dû re Dayikên Aştiyê agirê Newrozê pêxistin. Pîrozbahiya Newroza 2025’an bi gerandina govendê bi dawî bû.
Mugla-Bodrum
Li navçeya Bodrumê bi heman dirûşmê Newroz li Mumcular Pazaryerî hat pîrozkirin. Hevserokên DEM Partiyê yên Muglayê axivîn û Newroza gel pîroz kirin. Parlamenter Îbrahîm Akin jî di pîrozbahiyê de bal kişand ser bangewaziya Rêberê Gelê Kurd Abdullah Ocalan û got: “Kî alîgirê demokrasiyê be, hiqûq û edaletê bixwaze, bixwaze ku ev welat çarenûsa xwe ya hevpar bi hev re bijî, gelê Kurd zimanê xwe bi kar bîne û vê yekê weke mafekî demokratîk yê rewa qebûl bike, em ê li kêleka wan li ber xwe bidin û têkoşîna xwe bidomînin.”
Parlamenter Nejla Demîr jî wiha axivî: “40 sal in em li ber xwe didin. Îrade, çand û zimanê gelê Kurd bizanibin; em azadî û aştiyê dixwazin. Ev bar dikeve ser milê hemû gelê me. Civaka demokratîk wê bibe rizgariya hemû gelan. Jinan bi felsefeya ‘Jin jiyan azadî’ têkoşîna azadiya jinê ji sînoran wêdetir meşandin. Em bi baweriya biratî û aştiyê vê agirê Newrozê pêdixin. Agirê Newrozê ku bi hezaran sal in pêxistiye, wê dijminahiya zilm, mêtingerî û înkarê bişewitîne, aştî, jiyaneke wekhev, adil û bi rûmet û civaka demokratîk biafirîne. Bi vê baweriyê em bi milyonan tên cem hev û berxwedana xwe mezin dikin.”
Piştre Dayikên Aştiyê agirê Newrozê pêxist û cejna hemû gelê kurd û Rêberê Gelê Kurd Abdullah Ocalan pîroz kir. Gel li ber stranên Grup Golgedekîler û Hozan Şervan govend gerandin û Newroza xwe pîroz kirin.
Îzmîr
Li Îzmîrê jî bi deh hezaran welatiyên ku li Qada Gundogdu kom bûn, bi coşeke mezin Newroz pîroz kirin. Welatiyên ku bi cil û bergên kurdî daketin qadê, li dora agir û li ber stranan govend geraendin. Di pîrozbahiya li Îzmirê de jî beşdarê Newrozê bûn, azadiya fizîkî ya Rêberê Gelê Kurd Abdullah Ocalan xwestin. Di bernameyê de Aktîvîsta TJAyê Eylem Sarica bal kişand ser azadiya fizîkî ya Rêberê Gelê Kurd Abdullah Ocalan. Hevberdevka HDKê Meral Daniş Beştaş jî operasyonên li Stenbolê şermezar kir. Piştî axaftinan Dayikên Aştiyê ketin nava girseyê bi hevre li dora agirê Newrozê govend gerandin. Di pîrozbahiyê de piştî rêzgirtinê diruşmên “Bijî Serok Apo” û “Jin Jiyan Azadî” berz kirin. Di pîrozbahiyê de Hunermend Şîlan û Alî Tekbaş jî derketin ser dikê û bi stranên xwe gel coşandin. Bi deh hezaran kesên beşdarî pîrozbahiyê bûn, bê navber dirûşmeyên “Bijî Serok Apo” ber kirin. Bername bi stran û govendê bi dawî bû.
