Dadgeha Hiqûqê ya Asliye ya Stenbolê Serokê Baroya Stenbolê Îbrahîm Kaboglû û endamên lijneya rêveber ji peywirê girt. Hevseroka Giştî ya ÎHDê Eren Keskîn bertek nîşanî biryarê da û wiha got: “Ev biryar li dijî hiqûqê û li dijî daxwaza aştiyê ye.”
Dadgeha Hiqûqê ya Asliye ya 2yemin a Stenbolê, di çarçoveya lêpirsîna ji ber daxuyaniya der barê rojnager Cîhan Bîlgîn û Nazim Daştan ên li Bakur û Rojhilatê Sûriyeyê şehîd bûbûn, Serokê Baroya Stenbolê Îbrahîm Kaboglû û endamên lijneya rêveber ji peywirê girtin. Ji bo avakirina rêveberiya nû doz hatibû vekirin. Danişîna duyemîn a dozê li Dadgeha Hiqûqê ya Asliye ya 2yan a Stenbolê hat lidarxistin. Dadgehê bi îdiaya “propagandaya rêxistinê” û “bi rêya çapemeniyê belavkirina agahiyên şaş” dawî li peywira Serokê Baroya Stenbolê îbrahîm Kaboglû û endamên lijneya rêveber anî.
Têkildarî mijarê Hevseroka Giştî ya ÎHDê Eren Keskîn ji Ajansa Welat (AW) re nirxandin kir. Eren Keskîn ewil bal kişand ser daxuyaniya Baroya Stenbolê ya di 21ê kanûna 2024an de ji bo kuştina Rojnameger Nazim Daştan û Cîhan Bîlgin û wiha got: “Baroya Stenbolê xwest vê bûyerê di çarçoveya hiquqa mirovahiyê de lêpirsîn bê destpêkirin. Ev daxwaza li gorî peymana rêgezen navneteweyî ku Tirkiye jî îmze kiriye û li gorî hemû rêgezên hiqûqa mirovahiyê ye. Lê ji ber vê daxwaza hiqûqî Serdozgerê Komarê yê Stenbolê bi hinceta ‘Propaganda rêxistinê kiriye’ der barê rêveberiya Baroyê de lêpirsîn da destpêkirin. Serdozeriyê xwest Baroya Stenbolê ji peyvirê bigirin. Îro duyemîn danişîna dozê hat dîtin. Hemû baroyên Kurdistanê û gelek baroyên din beşdarî danişînê bûn. Dadgehê der barê Baroya Stenbolê de biryar da. Biryar da ku Rêveberiya Baroya Stenbolê ji peyvirê bigirin.”
Eren Keskîn destnîşan kir ku ev biryar bi temamî li dijî hiqûqê ye û got: “Li dijî daxwaza aştiyê ye. Li dijî daxwaza lêkolînê ya têkildarî kuştina bi şik hatiye dayîn. Ev daxwaza Baroya Stenbolê daxwazek herî xwezayî û hiqûqû bû. Lê mixabin, ji ber vê daxwaza mirovane ya Baroyê, Dadgeha Hiqûqê ya Asliye der barê Baroyê de biryara ku rêveberiyê ji kar bigirin da.”
‘Divê parêzer rûmeta parastinê biparêzin’
Eren Keskîn, da zanîn ku piştî vê biryarê rêyên îtîrazê û îstînafê heye û wiha axivî: “Ez difikir ku bi van biryaran rêveberiya Baroyê bêtesir bikin û erka wê ji destê wê bigirin. Li gorî min li vir bêtir erk dikeve ser parêzer û maqamê parastinê. Eger ji niha û şûnde Lijneyeke giştî pêk bê jî divê hemû parêzerên vê baroyê dîsa li rûmeta parastinê xwedî derkevin û dîsa heman rêveberiyê hilbijêrin. Em wekî parêzerên mafên mirovan em ê heta dawî li dijî vê biryarê bertekên xwe bînin ziman.”
