Li Êlih, Cizîr û Geverê bi sed hezaran welatî li qadên Newrozê kom bûn û bi coşeke mezin Newrozê pîroz dikin.
Cejna Newrozê li 14 navendên bakurê Kurdistanê bi dirûşma “Rêbertiya Azad Civaka Demokratîk” tê pîrozkirin. Bi sed hezaran welatî li taxan kom bûn û kom bi kom bi dirûşme û govendê berê xwe dan qadên Newrozê. Li Êlih, Cizîr û Geverê jî di saetên serê sibehê de gel berê xwe dan qadan. Bi sed hezaran welatî li Êlih, Cizîr û Geverê bi coşeke mezin Newrozê pîroz dikin.
Êlih
Li Êlihê bi hezaran kes tevî hewayê sar jî bi dirûşma “Bijî Serok Apo” beri bi qada Newrozê ve diherikin. Li Êlihê pîrozbahiya Newrozê bi dirûşma “Rebêrtiya Azad Civaka Demokratîk” tê lidarxistin. Bi hezaran kes, ber bi Qada Newrozê ya li Taxa Pazaryeriyê ve diherikin. Li gel barîn û hewayê sar jî welatiya li ber stranên Kurdî demeke dirêj govenda Newrozê gerandin. Herikîna gel a ji taxên Korik, Pazaryerî, Petrolkent, Îpragaz û Cûdî ya ber bi qada Newrozê ve didome. Piraniya welatiyan cil û bergên Kurdî li xwe kirine. Welatî, ji sê noqteyên lêgerînê derbasî qadê dibin. Li qadê flamayên kesk, sor û zer hatine hilgirtin û gelek caran dirûşma “Bijî Serok Apo” li qadê olan dide.
Hevserokê Giştî yê Partiya Herêmên Demokratîk (DBP) Keskîn Bayindir, Cîgirê Hevserokê Giştî yê DEM Partiyê Tayîp Temel û aktîvîsta Tevgera Jinên Azad (TJA) Mekiye Ormanci dê di pîrozbahiyê de biaxivin.
Gever
Ji bo pîrozkirina Newrozê li navçeya Geverê bi hezaran kes diherikin qada pîrozbahiyê. Yek ji navendên ku dê pîrozbahiya Cejna Newrozê lê wer lidarxistin jî navçeya Geverê ya Colemêrgê ye. Welatiyên navçeyê hêdî hêdî qada pîrozbahiyê tije dikin. Ji gelek deverên bajar welatî berê xwe didin Stadyuma Cîloyê ku dê Newroz lê were pîrozkirin. Ji navçe û gundên derdorê jî gelek kes beşdarî pîrozbahiyê dibin. Piraniya beşdaran jin û ciwan in. Welatiyên ku bi cil û bergên xwe yên Kurdî tev li pîrozbahiyê bûn, govendê digerînin û li qadê dirûşma “Bijî Serok Apo” olan dide.
Cizîr
Li navçeya Cizîrê bi hezaran kes ji bo hilkirina agirê Newrozê diherike qada pîrozbahiyê. Li navçeya Cizîrê ya Şirnexê Cejna Newrozê bi dirûşma “Rêbertiya Azad Civaka Demokratîk” tê pîrozkirin. Pîrozbahî, li Qada Bajar a li Taxa Konakê tê lidarxistin. Bi hezaran kes di saetên zû yên serê sibehê de berê xwe dan qada Newrozê. Welatiyên ku cil û bergên Kurdî li xwe kirin, gelek caran dirûşma “Bijî Serok Apo” berz dikin. Hatina gel a qada pîrozbahiyê didome û coşa li qadê her ku diçe zêdetir dibe. Hevşaredara Bajarê Mezin a Wanê Neslîhan Şedal ku li şûna wê qeyûm hatiye tayînkirin û Parlamentera DEM Partiyê ya Şirnexê Newroz Uysal Aslan dê di pîrozbahiyê de biaxivin. Piştre jî hunermend Rojda, Kasim Taşdogan û Hozan Şervan derkevin ser dikê.
