Rojnamegerê ji Belçîkayê Chris Den Hond ê ku ji bo pîrozbahiyên Newrozê û geşedanên siyasî bişopîne hat Tirkiyeyê, li Balafirgeha Stenbolê hat dersînorkirin.
Rojnamegerê ji Belçîkayê Chris Den Hond ku li Fransayê dijî ji bo geşedanên siyasî û pîrozbahiyên Newrozê bişopîne duh hat Stenbolê. Chirs Den Hond duh dema li Balarfirgeha Stenbolê peya bû, ji aliyê polîsan ve hat sekinandin û wî birin qereqola polîsan. Polîsan bi hinceta “Tu di lîsteya reş de cih digirî û hatina te ya Tirkiyeyê qedexe ye” wî deport ango dersînor kirin.
Chris Den Hond bi vîdeoyekê dersînorkirina xwe vegot û diyar kir ku hatina wî ya Tirkiyeyê hat qedexekirin û cara yekem e ku tiştek wiha tê serê wî. Chris Den Hond da zanîn ku tu belgeyek fermî ya qedexeyê ji bo wî nehatiye nîşandan û pîşeya wî ya rojnamegeriyê hatiye astengkirin. Chris Den Hond got ku hatina wî ya Tirkiyeyê ji bo 10 salan hatiye qedexekirin.
Chris Den Hond salên berê jî gelek caran hatiye Tirkiyeyê û pîrozbahiyên Newrozê şopandiye. Her wiha Chris Den Hond gelek caran serdana Rojavayê Kurdistanê jî kiriye û geşedanên li wir şopandiye.
Chris Den Hond destnîşan kir ku ji ber ku ew çûye Rojava û Kobanê û tev li pîrozbahiya salvegera rizgarkirina Kobanê bûye hatina wî ya Tirkiyeyê hatiye qedexekirin.
