Li Bendava Tişrînê berxwedana gel bi biryardariyeke mezin dikeve meha xwe ya sêyemîn. Heya niha zêdetirî deh hezar welatiyên ji tevahiya pêkhateyan nobeta parastina bendavê girtiye. Gel parastina bendavê wek erkeke nîştimanî dibîne.
Dewleta Tirk û grûbên paramîlîter ên girêdayî wê ji 8ê Kanûna 2024an ve êrişên xwe li ser Bendava Tişrînê û Pira Qereqozaqê berdewam dikin. Di encama êrişan de ku balafirên şer, yên bêmirov ên biçek, obîs, moşek û tank û hawan tê de têne bikaranîn, zirarên mezin gihaştin bendavê. Dewamkirina êrişan jî metirsiyên hilweşîna bendavê û rûdana karaseteke mirovî û jîngehî çêdike. Lewra gelê Bakur û Rojhilatê Sûriyeyê bi hemû pêkhateyên xwe ji bo parastina bendava û li dijî êrişan ji 8ê Çileyê ve nobeta parastina bendavê digire. Heya niha ji kantona Firatê 5 karwan, ji kantonên Tebqa, Reqa û Dêrazorê 4 karwan û ji kantona Cizîrê jî 12 karwanên gel nobeta parastina bendavê dewr girtiye.
Li gorî nûçeya ANHAyê; Ji roja 8ê Çile vir ve di êriş û bombebaranên dewleta Tirk û komên wê yên paramîlîter de 25 welatî hatin kuştin û zêdetirî 240 welatî jî birîndar bûn.
Di bombebarana roja 18ê Çile de şanoger Bavê Teyar (Cûma Îbrahîm Xelîl) jî hat qetilkirin.
Di 15ê Sibatê de rojnameger Egîd Roj jî ji di encama êrişa dewleta Tirk de jiyana xwe ji dest da.
Di êrişên li ser nobedarên bendavê de, 7 jê rojnamevan, hevseroka Desteya Perwerde û Fêrkirinê ya Herêma Bakur û Rojhilatê Sûriyeyê Semîra Hec Elî û Cîgira Hevserokên Meclisa Rêveber a Kantona Cizîrê Hemrîn Elî jî di nav de, zêdetirî 240 kes birîndar bûn.
‘Berxwedanê mohra xwe li dîrokê da’
Hevserokê Meclisa Rêveber a Rêveberiya Xweseriya Demokratîk a Kantona Firatê Ferhan Hec Îsa diyar kir ku 2 meh in gelê Bakur û Rojhilatê Sûriyeyê ji bo parastina av û erdê xwe ji êrişên dewleta Tirk û çeteyên wê nobeta Bendava Tişrîn digire û got: “Parastina bendavê erkeke ku ji her kesî tê xwestin.”
Endamê Komîteya Navendî ya Partiya Demokratîk a Kurd li Sûriyeyê (PDKS) Gêlo Îsa yê beşdarî berxwedana bendavê bûye jî bi bîr xist ku dema karwanê sêyem diçû bendavê, bûyereke gelek biêş qewimî û got: “Dema em gihaştin bendavê dewleta Tirk a dagirker du caran bi dronan êrişî me kir, di encamê de gelek kes şehîd û birîndar bûn.”
Gêlo Îsa anî ziman berxwedana li bendavê bi gotinan nayê wesifandin û wiha got: “Ev berxwedan dîrokî ye, dê mohra xwe li dîrokê bihêle. Heya bidestxistina serkeftinê dê berxwedan bidome.”
