Wan – Endamên Meclisa Dayikên Aştiyê têkildarî banga Rêberê PKKê Abdullah Ocalan axivîn û diyar kirin ku mifteya azadiyê di destê Abdullah Ocalan de ye. Dayikan xwest ku çek ji bo wan bibin gul û çîçek gotin: “Em naxwazin li vî welatî şer hebe û em dixwazin her kes azad bijî.”
Rêberê PKKê Abdullah Ocalan, di 27ê Sibata 2025an de bi rêya şandeya Partiya Wekhevî û Demokrasiyê ya Gelan (DEM Partî) ku ji Pervîn Bûldan, Sirri Sureyya Onder, Ahmet Turk, Cengiz Çîçek, Tulah Hatîmogûllari, Tûncer Bakirhan û Faîk Ozgur Erol pêk dihat, bangek belav kir. “Banga Aştî û Civaka Demokratîk” ku weke banga sedsalê hat ragihandin ji aliyê gelek beşên civakê ve bi coş û kêfxweşî hat pêşwazîkirin. Her kes erênî li vê bangê û qonaxê dinêre. Malbat û şexsiyetên ku di van 50 salên dawî de bedelên mezin dan, piştgirî dan vê bangê û xwestin pêvajoya aştiyê tavilê bê destpêkirin.
Endamên Meclisa Dayikên Aştiyê jî ku ji wan malbat û kesên bedelên giran dayî ne, piştgiriya xwe ji bo Rêberê PKKê Abdullah Ocalan ragihandin û daxwaza aştiyê kirin.
Dayika Zekiye Kaya anî ziman ku ew 45 sal in ji bo aştiyê destê xwe dirêj dikin û diyar kir ku aliyekî niha agirbest îlan kiriye. Zekiye Kaya bi lêv kir ku tenê bi ragihandina agirbestê ya ji aliyekê ve têra aştiyê nake û divê her du alî jî agirbestê îlan bikin. Zekiye Kaya destnîşan kir ku divê bikaranîna çekan bê sekinandin û got: “Divê devê çekan bê girtin û divê çek ji bo me bibin gul û çîçek. Em naxwazin li vî welatî şer çêbibin û bes e êdî bila xwîn neyê rêjandin. Em weke dayikan bang dikin ku bila ti kes li dijî aştiyeke birûmet nekeve di nava xebatên nebaş. Bila herkes destê xwe deyne li ser wijdana xwe û destê xwe dirêjî aştiyê bike. Em bang li hemû dayikan dikin ku destê dayikên Aştiyê bigirin û em li vî welatî bibin pira azadiyê.”
‘Mifteya azadiyê di destê birêz Ocalan de ye’
Zekiye Kaya da zanîn ku ew tundî, qeyûm naxwazin û ew edaletê dixwazin. Zekiye Kaya ji bo rawestandina çekan bang li dewletê jî kir û ev tişt got: “Bi sekinandina çekan dê aştî bê vî welatî. Bila dewlet dest ji tundiyê berde, deriyê zîndanan veke ku aştî bê. Em jî aştiyeke mayînde dixwazin ku em bibin yek. Bila dayikên gerîla, leşker û polîsan destê xwe bidin destê hev. Çareserî aştî ye. Heta birêz Ocalan azad nebe gelê Kurd jî gelê Tirk jî azad nabe. Mifteya aştiyê di destê birêz Ocalan de ye. Em bi bingeheke baş û rast û diristî aştiyekê dixwazin. Em jî ji bo aştiyê amade ne, em bi salan e destê aştiyê dirêjî wan dikin û bila êdî ew jî destê me bigirin.”
‘Gotina Serokatî gotineke pîroz e’
Dayika Henîf Koçak jî destnîşan kir ku bi banga Abdullah Ocalan cîhan hemû rabû li ser pêyan û got ku hemûyan jî ji bo vê bangê kêfxweşiyên xwe anîn ziman. Henîf Koçak da zanîn ku bila kesên xwedî wijdan jî vê banga Abdullah Ocalan vala nehêlin û wiha axivî: “Bila herkes li vî dengî hişyar bin û ev gotina Serokatî gotineke pîroz e û ji bo hemû mirovan pêwîst e. Me dayikan parçe ji canê xwe dane û em naxwazin dayikên din jî parçeyan ji canê xwe bidin û negirîn. Dayikên leşker û polîsan jî divê destên xwe bidin destên me. Em hemû jî aştiyê dixwazin û em mirinê naxwazin. Em dibînin ku hêj jî dewletê ti gav neavêtin e. Em bibêjin tiştekî vala ye, na. Dibe ku tiştek çêbibe û hêviya me heye. Bang li hemê xwedî wijdan û Kurdan dikin ku bila vê banga xwedî derbikevin û xelet jî fêm nekin. Serokatî bangeke pîroz kiriye û ev agirbesta ku hatiye îlan kirin jî kêfa me aniye. Em dibêjin êdî mirin bes e. Divê tecrîd jî li ser Serokatî û hemû girtiyan rabe. Heta Serokatî di nava gelê xwe de nebe ev aştiye jî pêk nayê, ev rastiyek e. Divê yekitiya me mezintir bibe û em ji hev bawer bikin.”
‘Em her tim aştîxwaz bûn’
Dayika Kiymet Arvas jî axivî û diyar kir ku bangeke gelek mezin ji bo miletekî bindest kir. Kiymet Arvas anî ziman ku hêviya wan ew e ku ev pêvajo bê şer, bê xwîn rejandin biçe serî û wiha got: “Me ti caran şer nexwestiye û em hertim aştîxwaz bûne. Îro Kurd, Tirk, Ereb û Ecem em hemû di nava hev de dijîn. Em dixwazin ew jî destê xwe dirêjî aştiyê bikin û em bi hev re bijîn. Em nabêjin em ê biqetin, lê em naxwazin welatê me jî xera nebe. Divê hem ji me hem jî ji wan gavên şênber û xweş bên avêtin. Em çawa aştiyê dixwazin divê ew jî wisa aştiyê bixwazin ku ev pêvajo ser bikeve. Em ji herkesî re azadî û aştiyê dixwazin. Serokatî paşve gav naavêje, ew hertim alîgirê aştî û azadiyê ye.”
