Hevşaredarên Tuşbayê û Hevserokên Navçeyê yê DEM Partiyê, li şeş gundan li gel welatiyan hevdîtin kirin. Di hevdîtinan de li gel daxwazên rê û kevirên parke yên kilîtkirî, pira çem, qanalên avdaniyê û pêdiviyên piştî erdhejê hatin rojevê.
Şaredariya Tuşbayê û Rêxistina Navçeyê ya DEM Partiyê ya Tuşbayê serdana gundên Qozluca, Kendalova, Nebat, Derebelek, Qereagaç û Baxdeşan kirin. Hevserokê DEM Partiyê yê Tuşbayê Refîk Çîdal, Hevşaredar Xane Akkoş û endamên meclisê li Derebelek, Qereagaç û Bexdaşan; Hevseroka Navçeyê ya DEM Partiyê Hacer Orhan, Hevşaredar Ûmît Keser û endamên meclisa şaredariyê jî li Qozluce, Kendalova û Nebatê ligel niştecihên gundan hevdîtin pêk anîn.
Heyetan daxwaz, pêşniyar û rexneyên keyayan û welatiyan guhdar kirin û xebatên heyî li gel plansaziya xizmetê ya serdema pêş jî nirxandin.
Pêdiviyên piştî erdhejê û qanalên avdaniyê
Di serdanên Derebelek, Qereagaç û Baxdeşan de welatiyan xwestin ku pirsgirêkên kolan û rêyan bên çareserkirin, xebatên kevirên parkê yên kilîtkirî û xebatên binesazî bên xelaskirin. Niştecihên ku mal û govên wan di erdhejê de zerar dîtine, zerarên xwe vegotin. Welatiyên ku bi çandinî û sewaldariyê debara xwe dikin jî ji bo pirsgirêkên ku ji ber xirabûna qanalên avdaniyê û herikîna axê çêbûne çareserî xwestin.
‘Tayînkirina qeyim bandor li ser xizmetan dike’
Hevşaredara Şaredariya Tuşbayê Xanê Akkoş diyar kir ku Tuşba xwedî erdnîgariyeke fireh û pêdiviyên alavên binesaziyê ên cidî ye û bal kişand ser budçe û derfeta sînorkirî ya şaredariyê. Akkoş anî ziman ku îsal li seranserî navçeyê karîbûne 60 hezar mêtroçargoşe xebata kevirên parkê pêk bînin û got ku ji bo belavkirina adil a xizmetan pêşîniyê didin taxên ku berê têra xwe xizmet nestendine.
Xanê Akkoş got ku sînorkirina derfeta Şaredariya Bajarê Mezin a ku qeyim lê hatiye danîn û betalkirina hin projeyan xizmetan bandor kiriye û anî ziman ku ji bo xebatên kêm mayî dê ligel niştecîhên taxê plansaziyê bikin.
Li Qozlucayê daxwaza pira çem û rêya girêdanê
Di hevdîtinên Qozluca, Kendalova û Nebatê de jî xwestin ku rêyên nav taxan bên başkirin, kevirên parkê yên kilîtkirî bên danîn, vîraj bên firehkirin û li xalên pêwîst bên stabilîzekirin. Asfaltkirina qadên ku li derdora mizgeftê xetereya ewlehiyê çêdikin jî di nav daxwazan de bû.
Li Kozluca’yê welatiyan xwestin ku rêyên nav taxê û yên girêdanê bên başkirin û rêya nêzî 250 heta 400 mêtro ya di navbera du taxan de were başkirin. Şêniyên taxê diyar kirin ku di mehên zivistanê de bi bilindbûna ava çem derbasbûn dijwar dibe û xwestin ku li vê xalê boriyeke koruge were danîn. Pêdiviya maşîneya kar jî ji heyetê re hate vegotin.
‘Em bi gel re biryar digirin’
Hevşaredar Ûmît Keser bal kişand ser girîngiya serdanên gundan û teqez kir ku têgihiştina wan a şaredariyê ne biryardana li ser maseyê, lê di nav gel de, li qadê û bi hevparî hilberandina xizmetê ye. Umît Keser got: “Me armanc kir ku berî ku demsala zivistanê bikeve, gund û taxên xwe ziyaret bikin û digel welatiyên xwe nêrînan biguherînin. Ji roja destpêkirina kar ve em hewl didin ku ji nav çar dîwarên avahiya şqredariyê derkevin û li taxên xwe digel gelê xwe hevdîtin bikin. Dîtina kêmasiyên xwe di cih de, guhdarîkirina rasterast a rexne û hêviyan ji bo me pir biqîmet e. Ji ber ku pêdiviyên taxan herî baş welatiyên ku li wê taxê dijîn dizanin. Em dixwazin çareseriyê jî digel gelê xwe hilberînin.”
‘Rexne dê çareseriyê hêsantir bikin’
Umît Keser li ser barê deyn û sînorkirinên budçeyê yên şaredariyê jî axivî û got ku dixwazin kêmasiyan digel welatiyan bi awayekî eşkere bipeyivin û xizmetan bi hev re plansaz bikin. Umît Keser diyar kir ku ji ber vê yekê serdanên taxan girîng dibînin û got ku dîtina pêdiviyan di cih de û guhdarîkirina rasterast a rexneyan hilberandina çareseriyê hêsantir dike.
