Di hefteya 6emîn a Lîga Super a Tirkiyeyê de Amedsporê li Stada Tahîr Elçî ya Amedê Beşîktaş jî têk bir û di lîgê de derket rêza yekemîn.
Di hefteya 6emîn a Lîga Super a Tirkiyeyê de Amedspor û Beşîktaş li Stada Tahîr Elçî ya Amedê hatin hemberî hev. Bi deh hezaran alîgirên Amedsporê beriya maçê ketin stadê.
Beriya maç dest pê bike alîgiran dirûşmên “Şampiyon Amed”, “Amed Amed”, “Kîne em, Kurd in em” berz kirin. Alîgirên ku lambeyên telefonên xwe vekirin û stran gotin, sirûda “Dîren Ha Diyarbekîr Dîren” berz kirin. Her wiha li stadê stranên Kurdî û Tirkî hatin lêxistin.
Amedsporê zû dest bi maçê kir û di deqîqeya 13an de lîstikvanê wê Gîft Emanuel Orban gol avêt û Amedspor 1 û 0 ket pêşiya Beşîktaşê.
Amed di deqîqeya 21an de 2 û 0 ket pêş
Dema deqîqe bû 21 û alîgirên Amedsporê lambeyên telefonên xwe bi hev re vêxistin Dîa Saba goleke din avêt û skor bû 2 û 0.
Amedsporê dû re çend pozîsyonên golê bi dest xistin lê nekarî bike gol. Hakemê maçê 3 deqîqe li 45 deqîqeyên beşa ewil a maçê zêdekirin. Di van 3 deqîqeyan de jî tu gol nehatin avêtin û beşa ewil a maçê 2 û 0 bi dawî bû.
Di navbera maçê de alîgirên Amedê li ber stranan al û stûmalên xwe hejandin û govend gerandin.
Bi destpêkirina beşa duyemîn Beşîktaşê lîstikeke bi bandor lîst û di encama wê de lîstikvanê wê Dusan Vlahovic di deqîqeya 55an de gol avêt û skor bû 2 û 1.
Dû re tenê piştî 4 deqîqeyan di deqîqeya 59an de lîstikvanê Amedsporê Fûrkan Soyalp gol avêt û skor bû 3 û 1.
Alîgirên Amedsporê di tevahiya maçê de dirûşm berz kirin piştgiriya tîma xwe kirin. Amesporê di beşa duyemîn a maçê de çend pozîsyonên golê bidestxistin lê nekarî golan biavêje.
Alîgiran bertek nîşanî hakemî dan
Hakemê maçê di deqîqeya 84an de qertê duyemîn ê zer da lîstikvanê Amedsporê Amudo Cisse ji lîstikê derxist. Dû re hakemî di deqîqeya 98an de penaltiyek da Beşîktaşê. Orkûn Kokçu ku penalti bikaranî kir gol û skor bû 3 û 2.
Tevî hakemî maç ji di dema wê de neqedand û dirêj kir jî Beşîktaşê nekarî tu golên din biavêje û maç 3 û 2 xelas bû. Tevî gelek biryarên hakemî yên li dijî Amedsporê jî Amedsporê maç qezanç kir. Alîgiran di tevahiya maçê de bertek nîşanî biryarên hakemî dan.
Piştî maç qediya alîgiran sirûda “Dîren Ha Diyarbekir Dîren” berz kirin û bi lîstikvanan re encam pîroz kirin.
Kes nikare li sehaya Amedsporê wê têk bibe
Bi vê encamê Amedsporê pûanên xwe kir 13 û di lîgê de derket rêza yekemîn. Amedspor 26 maç in li sehaya xwe têk naçe.
Ji ber navbera tîmên netewî ya serdema 2026-2027an wê di lîgê de ji 21ê Îlonê heta 6ê Cotmehê maç neyên lîstin. Ji ber vê yekê Amedsporê dê di 10ê Cotmehê de saet di 13.30an de li Enqereyê bi tîma Gençlerbîrlîgiyê re bilîze.
