Nivîskar Mahîr Dogan di hejmara 8emîn a Kovara Ozgur Halkê de bi gotara xwe ya bi sernavê “Ji Sêdarê Ber bi Maseya Mizakereyê ve” pêvajoyên dîrokî û siyasî yên têkoşînê, veguhêzên stratejîk û tekoşîna aştiyê digire dest. Dogan di nivîsa xwe de destnîşan dike ku nêzîkatiya maseya muzakereyê ne tesadufî ye, encama berxwedana dîrokî ya ji sêdaran heta îro ye.
Nivîskar Mahîr Dogan di hejmara 8emîn a Kovara Ozgur Halkê de li ser pêvajoya siyasî û xeta diyalogê nirxandinên girîng kirin. Dogan balê dikişîne ser dîroka têkoşînê û destnîşan dike ku hemû destkeftiyên siyasî bi bedelên mezin hatine bidestxistin. Mahîr Dogan anî ziman ku siyaseta qirkirinê û polîtîkayên darvekirinê nekarîne vîna gelê Kurd bişikînin û wiha nivîsand: “Pêvajoya ku ji sêdaran ber bi maseya mizakereyê ve çûye, serkeftina vîna berxwedêr û biryardariya azadiyê ye.”
‘Mizakere encama berxwedana dîrokî ye’
Mahîr Dogan diyar dike ku ji bo avakirina çareseriyeke domdar, fêmkirina dîroka têkoşînê xala herî krîtîk e. Dogan tîne ziman ku hêzên desthilatdar tenê gava rastî berxwedaneke mezin hatine neçar mane ku rûnên li ser maseyê. Dogan wiha dinirxîne: “Maseya mizakereyê ne cihê tawîzan e; berevajî vê, qada rewakirin û ferzkirina mafên rewa yên gel e ku bi salan di bin zextê de hatine tepisandin.”
‘Têkoşîna siyasî û biryardariya îdeolojîk’
Di gotarê de Dogan rexneyên tûj li nêzîkatiyên erzan û nirxandinên lewaz ên li ser pêvajoyê dike. Dogan domandina sekna siyasî û îdeolojîk wekî merceke sereke ya serkeftinê pênase dike. Di nivîsa Dogan de tê diyarkirin ku di nav pêvajoya muzakereyê de jî divê têkoşîn bi her awayî berdewam bibe. Dogan van nirxandinan dike: “Ji bo ku maseya çareseriyê encamê bide, pêwîst e biryardariya civakî û tevlîbûna gel a di pêvajoyê de her tim di asta herî jor de be.”
‘Bêyî naskirina îradeyê çareserî çêna be’
Yek ji mijarên sereke yên ku di gotarê de li ser tê rawestandin, pêwendiya kûr a di navbera aştiya rastîn û naskirina îradeya gel de ye. Dogan diyar dike ku aştiyek ku nenasîn û qirkirinê kûr bike nabe aştî û wiha dibêje: “Bêyî naskirina îradeya siyasî û misogerkirina mafên hiqûqî, çareseriyeke rastîn ava nabe. Avakirina maseya mizakereyê gava yekemîn e ji bo derbasbûna ber bi şaristaniya demokratîk ve.”
‘Divê civak bibe aktorê pêvajoyê’
Dogan destnîşan dike ku pêvajoya mizakereyê ne tenê di navbera aliyên siyasî de birêve diçe, divê civak bi xwe bibe aktorê vê pêvajoyê. Dogan wiha didomîne: “Hêz û serkeftina diyalogê bi tevlîbûna dînamîkên civakî ve girêdayî ye. Di hemû gavan de divê daxwaz û biryardariya gel bibe rêberê esasî.”
‘Garantîkirina pêşeroja azad bi têkoşînê pêkan e’
Di dawiya nivîsê de Dogan balê dikişîne ser xeta berxwedanê û sekna li beramberî xetereyan. Mahîr Dogan diyar dike ku garantiya pêşerojê berî her tiştî birêxistinbûn û hişmendiya siyasî ve girêdaye. Dogan nivîsa xwe wiha bi dawî dike: “Gel û tevgera ku tevlî vê pêvajoyê dibe, divê bi hişyarî nêzî hemû lîstikan bibe û xeta berxwedanê li ser maseyê jî biparêze. Ev proseya veguhertina berxwedanê ye ku rê li ber avakirina jiyaneke azad û aştiyane vedike ye.”
