Platforma Ked û Demokrasiyê ya Semsûrê destnîşan kir ku midaxaleya li ser îradeya gel zirarê dide proseya entegrasyona demokratîk û bang kir ku divê perwerdehiya zimanê dayikê bibe xwedî misogeriya qanûnî û hemû êrişên li ser çalakiyên demokratîk bêne rawestandin.
Platforma Ked û Demokrasiyê ya Semsûrê têkildarî rûdanên herî dawî yên li Rojavayê Kurdistanê û bi taybetî li piştî kuştina Şehîd Sîpan Hiznî ya bi awayekî hovane, li Kobanê de ku 9 kesan jiyana xwe ji dest dan û 17 kes birîndar bûn li Meydana Bajêr daxuyani da. Di daxuyaniyê de pankarta “Em dengê xwe bilind dikin” hat vekirin.
Li ser navê Platformê Hakî Akdag metna daxuyaniyê xwend. Hakî Akdag destnîşan kir ku êriş, binçavkirin û girtinên li dijî berteka demokratîk a gel provokasyonek e ku rasterast proseya entegrasyona demokratîk a li Sûriyeyê dike armanc û got: “Nîşandana van bûyeran wekî pirsgirêkeke eşîretî an jî takekesî, tenê ji bo nixumandina pênaseya siyasî û civakî ya bûyerê ye. Ketina van hêzan a nav Kobanê û midaxeleya li ser gel, destwerdana li dijî îradeya herêmî û demokrasiyê ye. Çareserî û kûrkirina proseya entegrasyona demokratîk ne bi rêbazên leşkerî û ewlehiyê, lê belê bi diyalog, muzakere û bingeha îradeya azad a gelan pêkan e.”
Hakî Akdag diyar kir ku ji bo çareseriya mayînde ev daxwaz anî ser ziman û wiha bang kir: Mafê perwerdehiya bi zimanê dayikê ku gelê Kurd 14 sal in bi kar tîne, nabe bibe mijara nîqaş û bazariyê; divê bibe xwedî misogeriya qanûnî û mayînde. Divê êrişên li ser çalakiyên demokratîk di cih de bêne rawestandin û dawî li siyasetên ewlehîperest û derveyîkirinê were anîn. Kuştina Sîpan Hiznî, midaxeleya li ser gelê Kobanê û sedema şewata di girtîgehê de divê bi hemû aliyên xwe ve di bin lêpirsînê re derbas bibin.”
Di dawiya daxuyaniyê de bang li hemû rêxistinên civakî û raya giştî ya navneteweyî hate kirin ku li dijî hewldanên lawazkirina aştî û îradeya hevpar a gelan xwedî helwesteke yekgirtî bin.
Daxuyanî bi lêdana çepikan dawî bû.
