Bîranîna şehîdên Tevgera Azadiyê li Enqereyê di roja 2yemîn de bi dawî bû. Di roja 2emîn a bîranînê de mewlûd hate xwendin û li sînevîzyona ku qala jiyan û têkoşîna şehîdan dikir, hate temaşekirin. Di bîranînê de peyama xwedî derketina li mîrateya şehîdan hate dayîn.
Saziyên Platforma Demokratîk ji bo endamên Tevgera Azadiyê ku li dever û di dîrokên cuda de jiyana xwe ji dest dane li avahiya Rêxistina DEM Partiyê ya Enqereyê bernameya bîranînê li dar xist. Malbatên şehîdan, endam û nûnerên partiyên siyasî, saziyên sivîl ên giredayî platformê tev li bîranînê bûn. Di 2 rojên bîranînê de bi hezaran kesan serdanê kir û ji malbatan re sersaxî xwest.
Di roja 2yemîn a bîranînê de serdanê berdewam kir û ji bo şehîdan mewlûd hate xwendin. Piştre Parlamenterê DEM Partiyê yê Şirnexê Mehmet Zekî Îrmez axivî. Mehmet Zekî Îrmez bi lêv kir ku ew bi saya ked û têkoşîna cangoriyan hatine van rojan û wiha got: “Heke îro ew pêvajo heye bi saya ked û têkoşîna wan e. Heke gelê Kurd îro nasname û hebûna xwe dabe qebûlkirin bi saya van cangoriyên me ye. Divê em jî xwedî li mîrateya wan derbikevin. Em xwedî li pêvajoya Aştî û Civaka Demokratîk derbikevin.”
Piştî axaftinan li sînevîzyona ku qala jiyan û têkoşîna şehîdan dikir, hate temaşekirin. Di bîranînê de bênavber dirûşmeyên, “Bijî Serok Apo” û “Şehîd namirin” hatin berzkirin. Piştî temaşekirina li sînevîzyonê bîranîn bi dawî bû.
