Stenbol – Welatiyên ku li Stenbolê beşdarî bîranîna şehîdan bûn, diyar kirin ku ew bi saya şehîdan îro serbilind in û wiha gotin: “Pakrewanên me ji bo azadiya xwe û gelê xwe tevgeriyan. Em bi saya şehîdan li ser piyan in.”
Piştî Tevgera Azadiya Kurdistanê şehîdên xwe yên di dem û di dîrokên cuda de jiyana xwe ji dest dane aşkere kir, li Kurdistan û bajarên Tirkiyeyê bernameyên bîranînê tên lidarxistin. Bi hezaran welatî beşdarî bernameyên bîranînê dibin û xwedî li şehîdên Kurdistanê derdikevin. Li Stenbolê jî bi rojan e ku li gelek navçeyan bernameyên bîranînê û şînê tên lidarxistin. Welatiyên ku beşdarî şîna şehîdan bûn, ji ajansa me re axivîn.
‘Em bi şehîdên xwe serbilind in’
Dayika bi navê Kamîle Koç bal kişand ser girîngiya têkoşîna Tevgera Azadiyê û wiha got: “Em bi saya şehîdan li ser piyan in. Em bi şehîdên xwe serbilind in. Demekî em ji leşkeran li gundan direviyan. Bi saya şehîdan em îro hatine vê astê. Em naxwazin zarokên me şehîd bikevin. Em bejna xwe li ber şehîdan ditewînin. Em bindestiyê qebûl nakin. Heta dawiyê em li ser piyan in. Bila tevahî gelê Kurd mafê xwe bixwaze. Em Serokê xwe dixwazin.”
‘Divê em xizmeta şehîdên xwe bikin’
Abdurrahîm Yildirim anî ziman ku şehîdî, baweriyek e û wiha axivî: “Ew kesê ku herê axa kesekî din dagir bike, şehîd nabe. Kesek ku bi pere herê cihêkî din û li wir dagir bike, nabe şehîd. Berjewendiya cîhanê di serê pakrewan û şehîdên me re derbas nabe. Pakrewanên me ji bo azadiya xwe û gelê xwe tevgeriyan. Heta ku derfet di destê me de hebe, divê em xizmetê şehîdên xwe bikin.”
‘Dilê me dişewite’
Dayik Zahîde Îlbas destnîşan kir ku ew aştiyê dixwazin û got: “Em daxwaza aştiyê dikin ku şehîd nebin. Dilê me dişewite. Em daxwaza mafê xwe û azadiya xwe dikin. Em Serokê xwe dixwazin. Bila deriyên girtîgehan vebin. Gerîla ji bo mafê gelê xwe çûn ser çiyê û şehîd ketin. Em naxwazin êdî gerîla şehîd bikevin.”
‘Em ji bo ax û gelê xwe têdikoşin’
Dayika Gulbahar Avci jî diyar kir ku şehîd ji bo wan ji her tiştî girîngtir e û got: “Em ji bo ax û gelê xwe têdikoşin. Şehîdên me jî di vê rêyê de canê xwe dan. Divê em jî xwedî li şehîdên xwe derkevin. Îro dilê tevahî gelê Kurd dişewite. Em aştiyê dixwazin.”
