Endamên saziyên sivîl û siyasetmedarên Kurd ji bo şîna cangoriyên Tevgera Azadiya a Kurd bang li gelê Amedê kirin û wiha gotin: “Ji bo mîrateyên cangoriyan bila gelê Amedê tev li şînê bibin û xwedî malbatên xwe derkevin.”
Bi pêşengtiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Amedê, ji bo 49 cangoriyên Tevgera Azadiyê ya Kurd ên di dîrokên cuda de jiyana xwe ji dest dane, li Parka Koşuyoluyê ya Amedê şîn hate danîn. Şîna ku dê 3 rojan berdewam bike îro dest pê kir. Parlementerê DEM Partiyê yê Amedê Mehmet Kamaç, hunermend Şêrko Kanîwar û hevserokê MEBYA-DERê ya Amedê Ramazan Dengîz ji bo tevlibûna şînê bang li gelê Amedê kirin.
‘Em bi hevre xwedî şehîdên xwe derkevin’
Di bangawaziya tevlibûna bîranîna cangoriyan de hat destnîşankirin ku ji bo mîrateya cangoriyan divê gelê Amedê xwedî ji malbatan derbikevin û wiha hat gotin: “Heke îro pêvajoyeke aştiyê hebe bi saya serê wan pakrewanan heye, divê em jî xwedî vê mîrateyâ wan şehîdan û malbatên wan derkevin. Di şîna wan pakrewanan de li gel malbatên xwe bibin. Em bi hev re xwedî şehîdên xwe derkevin.”
