ÛPlatforma Ekolojiyê ya Şirnexê li hember santrala termîkê ya Silopya daxuyanî da û xwest demildest santrala ku jehrê belav dike were girtin.
Li Kolana Hunerê ya navçeya Silopya ya Şirnexê li hember Santrala Termîk a Silopya bi tevlibûna parlementerên DEM Partiyê yên Şirnexê Newroz Ûysal Aslan û Mehmet Zekî Îrmez, endam û rêveberên partiyên siyasî û saziyên civakî û gelek welatiyan daxuyanî hat dayîn. Di daxuyaniyê de pankarta, ‘Em ne jehrê, jiyanê diparêzin’ hat vekirin.
‘Jehra santralê bandorê li ser herêmê dike’
Beriya daxuyaniyê endamê Platforma Ekolojiyê ya Şirnexê Fadil Tay axivî û bal kişand ser qirêjiya hewayê Şirnexê û got: “Di aliyê qirêjiya hewayî de Şirnexê ji nav 81 bajaran di rêza 2yemîn de ye. Her hewayê ku em dikêşin hundirê xwe zerarê de pişika me.”
Fadil Tay destnîşan kir ku santrala termîkê bandorê li ser nexweşiyan dike û axaftina xwe wiha bi dawî kir: “Ji ber vê santralê nexweşiyên penceşêrê li Silopya gelekê zêde bûye. Ev santrala bandora xwe li ser hemû nexweşiyan dike. Tenê ne li Silopya, bandora jehra vê santralê li ser bajarên derdorê jî heye û divê demildest ev santral were girtin.”
‘Divê aştî bi xwezayê re were sazkirin’
Piştî Fadil Tay, endamê Platforma Ekolojiyê ya Şirnexê Tahîr Cîn daxuyanî xwend û wiha got: “Hewayê paqij, ava paqij, axa paqij û bajarek ê jiyanê mafê her kesî ye. Lê mixabin bi taybetî li Silopya û li tevahiya Botanê ev maf di bin xeteriyê de ye.”
Tahîr Cîn di dawiya daxuyaniyê de diyar kir ku divê aştî bi xwezayê re jî pêk were û axaftina xwe wiha bi dawî kir: “Divê em bi xwezayê re jî aştiyê pêk bînin, dema ku mafê civakê yê jiyanek ekolojîk pêk neyê ew civak demokratîk jî nabe. Ji ber vê yekê divê santrala termîkê were girtin û pêşî li talana xwezayê were girtin.”
Daxuyanî bi çepik û tililiyan bi dawî bû.
