Platforma Şiyar Be ya Erxeniyê der barê polîtîkayên şerê taybet, hişbir, fihûş û qûmarê de daxuyanî da û bang kir: “Êdî em dibêjin RABIN. Em hemû bi hev re li hemberî tiştên ku mirovan ji bingeha wan dûr dixe bisekinin.”
Platforma Şiyar Be ya li navçeya Erxenî ya Amedê der barê xetereya polîtîkayên qirêj ên li ser ciwan û civakê daxuyaniyek da. Daxuyaniya ku nûnerên saziyên sivîl û partiyên siyasî tevlî bûn, bi du zimanan hate xwendin. Metna Kurdî ji aliyê endamê Egîtîm Senê Servet Pala ve hat xwendin û ya Tirkî jî ji aliyê Hevseroka DEM Partiyê ya Erxeniyê Nûdem Arya Guzel ve hate xwendin.
‘Armanc bênasnamekirina ciwanan e’
Servet Pala di daxuyaniyê de bal kişand ser polîtîkayên înkarkirin, bişaftin û bê civakhiştinê û wiha got: “Ev pirsgirêk birîneke civakî ye; malên me, taxên me, bajarên me, çanda me û pêşeroja me eleqedar dike. Kujerên kastîk bi polîtîkayên şerê taybet, bi taybetî ciwan û jinan û tevahiya bajarê me ji xwe re kirine hedef. Ev polîtîka sedema xwekuştin û kuştina jinan zêde kiriye. Dîsa bi vê polîtîkayê ciwanan ji ramanên azad dûr dixe û bênasname dike.”
‘Êdî em dibêjin RABIN’
Servet Pala banga têkoşîn û rêxistinbûnê kir û wiha bi dawî kir: “Mixabin êdî tenê ne ciwan, zarok jî dikişînin nav vê çiravê. Em bi vê rastiyê re rû bi rû ne. Êdî em dibêjin RABIN. Em bi biryar in, israr dikin RABIN. Em hemû bi hev re li hemberî girêdayîbûna hişbirê, fihûşê, qumarê û tiştên ku mirovan ji bingeha wan dûr dixe bisekinin û em civaka axlaqî û rêxistinî bi rêve bibin. Em li hemberî dejenerasyonê, asîmîlasyonê, înkarkirinê di heqîqeta civakî de li hev bicivin û em bi hev re azad bibin. Em bi baweriya dîroka berxwedana gelê xwe îro jî sibê jî li hemberî wan bi hev re têbikoşin.”
