Bi pêşengtiya TJA, ANKA-DER Û TUHAY-DERê li Stenbolê li ser pêvajoya “Aştî û Civaka Demokratîk” civîn hate lidarxistin. Nivîskar û Rojnameger Haydar Ergul diyar kir ku qanûna hate derxistin destpêke lê ew dizanin ku kêmasî hene û got:”Ev zagon naskirina Kurdan e. Li kolanê ji kî re were pirsîn ew ê bibêjin Apo bi ser ket.”
Tevgera Jinen Azad (TJA) û Komeleya Piştevanî û Alîkariyê ya Malbatên ku Xizmên xwe Winda Kirine ya Anatoliyayê (ANKA-DER) Komeleya Çand û Komeleya Piştevaniya bi Malbatên Girtî û Hikûmxwaran re ya Stenbolê (TUHAY-DER) derbarê pêvajoya “Aştî û Civaka Demokratîk” li navçeyên navçeyên Sancaktepe û Kagitxaneyê civîn li dar xist. Malbatên şehîdan, Dayikên Aştiyê, endam û rêveberên partiyên siyasî û gelek welatî tev li civînan bûn. Li Kagitxaneyê civîn li Eywana Dawetê ya Labellayê hate lidarxistin.
Beriya ku bernameyê girseyê ji bo cangoriyên azadiya Kurdistanê deqîqeyek rêz girtin. Di rêzgirtinê de girseyê dirûşma “Bijî Serok Apo” û “Şehîd namirin” berz kirin û sirûda ‘Çerxa şoreşê’ xwend.
Li ser navê TJAyê Aksoy Aksû diyar kir ku 52 salan e zarokên gelê Kurd li ber xwe da û got: “Zarokên vî gelê dewleta ku xwest gelê Kurd tune bike îro aniye ser masayê. Çawa ku em xwedî têkoşîna wan derketin ji niha şûnde jî em ê xwedî nirxê wan derkevin. Heta îro gelek serhildan çêbû, lê tevahî serokê serhildanan hatin kuştin. Îro Serokê Gelê Kurd Abdullah Ocalan dewletê aniye masayê.”
‘Li kolanê ji kî re were pirsîn ew ê bibêjin Apo bi ser ket’
Nivîskar û rojnameger Haydar Ergul jî di civînê de axivî, anî ziman ku gelek kes hatin ji bo Kurdan bixapînin lê nekarîn û wiha got: “Serokatî tu car nehat xapandin. Em bi Serokê re girêdayî ne. Duh salvegera Pengava 15ê Tebaxê bû, cejn bû. Gava yekemîn hate avêtin û meş dest pê kir. Meşa yekemîn gelek zelal bû. Îro li tevahî cîhanê Kurd tên naskirin. Meclîsa ku dixwest Kurdan tune bike îro gelê Kurd nas dike. Ev gavekî ye, lê divê em bizanin li gorî 50 salan gavekî mezin e. Berî 27 salan cezaya îdamê dan Serok lê îro Serok pêvajoyê aniye ser masayê. Divê bi taybet em beriya 27 Sibatê û piştî 27ê Sibatê bizanin. Ez bendê me ku di rojên pêş de Serok li Îmraliyê tev li civîna çapemeniyê bibe. Qanûna hate derxistin destpêke lê em dizanin ku kêmasî hene. Lê ev zagon naskirina Kurdan e. Li kolanê ji kî werê pirsin ew ê bibêjin Apo bi serket. Serok pêşiya me vekir. Gerîla werin li Colemêrg û Amedê bimeşin ev serkeftin e. Lê rojekî Serok Apo dê werê li Amedê û Rihayê.”
Piştî axaftinan xwarin hate xwarin û civîn bi dawî bû.
