Şaredariya Bajarê Mezin a Amedê ji bo bihêzkirina aboriya jinan, zindîhiştina tovên xwemalî û teşwîqkirina hilberîna ekolojîk projeya Bîstanên Bajar ên Komunê yên Jinan xiste dewrê û berhemhilanîna pêşîn hat kirin. Jinên ku hemû qonaxên hilberînê bi hev re meşandin, zebze û nebatên bijîşkî û tamxweş ên ku çandibûn çinîn.
Şaredariya Bajarê Mezin a Amedê, xebatên xwe yên ji bo bihêzkirina aboriya jinan û belavkirina hilberîna ekolojîk berdewam dike. Bi pêşengiya Rêveberiya Bihêzkirina Aboriya Jinan a di bin banê Serokatiya Daîreya Polîtîkayên Jinan de, li Bîstanên Bajar ên Komunê yên Jinan berhemên yekem ên ked û piştgiriyê hatin çinîn.
Jinên ku di hemû qonaxên hilberînê de cih girtin û komunê ya jinan a ji 15 kesan hate avakirin, li bîstanên li jîngeha Serokatiya Daîreya Xizmetên Gundewarî ya li Talaytepeya navçeya Peyasê berhemên herêmî û xwemalî yên ku gihandibûn çinîn.
Di projeyê de ku armanca wê zindîhiştina tovên xwemalî, teşwîqkirina hilberîna ekolojîk û pêşxistina çanda piştgiriyê ya di navbera jinan de ye, tevî sewzeyan nebatên bijîşkî û aromatîk jî têne çandin. Jin dê di qonaxa yekem de berhemên mîna balîcan, bacanên sor, îsot, pûng, catir, rosmarîn û nêrgiza porteqalî ku ji bîstanan bi dest xistine ji bo hewcedariyên malên xwe bi kar bînin.
Bîstan bi şitilên ji tovên xwemalî hatine hilberandin hatin çêkirin
Seroka Daîreya Polîtîkayên Jinan Ozden Gurbuz Sumer, derbarê hûrgiliyên projeyê de agahî dan û da zanîn ku Bîstanên Bajêr ên Komûnê yên Jinan bi pêşengiya Rêveberiya Bihêzkirina Aboriya Jinan hatine çêkirin. Ozden Gurbuz Sumer anî ziman ku zeviyên hilberînê hatine diyarkirin û binesaziya teknîkî ya pêwîst ji aliyê Şaredariya Bajarê Mezin ve hatiye amadekirin û got: “Proje bi hevkariya Serokatiya Daîreya Xizmetên Gundewarî tê meşandin. Taybetmendiyên herî bingehîn ên bîstanan bikaranîna tovên xwemalî ye û qadên hilberînê bi şitilên ji tovên xwemalî hatine bidestxistin hatine avakirin.”
Ozden Gurbuz Sumer anî ziman ku jin ji çandiniyê heta çinînê, ji paqijkirina giyayên bizirar heta civandina berheman hemû qonaxên hilberînê bi hev re dimeşînin û pevajoya bi têgihiştineke xebatê ya hevpar û wekhev berdewam dike.
Jin bi ezmûn û zanîna teknîkî ya ku di bîstanan de bi dest dixin, armanc dikin ku di paşerojê de hilberînê belavî qadên berfirehtir bikin û di aboriya bajêr de roleke çalak xurtir bilîzin.
