Platforma Şiyar Be rêzeçalakiyên xwe yê bi Pêngava Rabin berdewam dike. Rawestgeha îro ya platformê Parka Korhatê ya navçeya Rezanê ya Amedê bû.
Platforma Şiyar Be ku li dijî tiryak û hişbirê têkoşînê dimeşîne, li Parka Korhatê ya taxa Korhatê ya navçeya Rezanê ya Amedê bi hevkariya Komeleya Çand û Hunerêya Dîcleyê ji bo zarokan kargeh li dar xistin. Di bernmameyê de bi zarokan re gelek listikên cuda lîstin bi amûran rîtîm hînî zarokan kirin û bi hev re stran stirîn. Piştî bernameya zarokan civîna gel hat lidarxistin. Aktîvîsta TJAyê Ayla Akat Ata, Hevşaredara Rezanê Leyla Ayaz, Hevberdevkê Platforma Şiyar Be Murat Kan, nûnerê saziyên sivîl û nişteciyên taxê tevli civînê bûn. Di axaftinan de têkoşîna li hemberî madeyên hişbirê hat dubarekirin.
Leyla Ayaz destpêkê axivî û got: “Li Kurdistanê ev demeke dirêjê weke şerê taybet fihûş tê kirin, tiryak tê firotin û bengîtî zêde bûye. Em bi gelê xwe re li ser çareseriya van pirgêrêkan civiyan. Em dizanin ku li wan xaniyên bêxwedî her tiştên xirap dibe. Em ê bi hev re wan deran xira bikin û em ê bi hev re li hember bengîtiyê têbikoşin.”
Murat Kan ji bal kişan ser Pêngava Rabin û got: “Ji ber ku me heta niha van qadan vala hiştine îro ev pirsgirêk ewqasî mezin bûye. Îro stratejiyeke qirêj li ser Kurdistanê tê meşandin. Ji ber vê me Pêngava Rabin da destpêkirin. Ev pêngav ji bo pêşeroja ciwanan e. Ev pengav ji bo azadiya jinan e. Ji bo wê divê herkes berpirsyariyê bigire ser xwe.”
Civînê de gel gazincên xwe ji walî û midûrê ewlehiyê kir û hat gotin ku tenê li ser kursiyên xwe rûniştîne û karekî li hemberî madeyên tiryakê nakin.
Piştî guhdarkirina gel Ayla Akat Ata axivî û got: “Ev demeke dirêje em li parkan bi gel re tên gel hev. Em bi tenê têrê nakin divê malbat jî alikariyê bikin. Şaredariyên DEM Partiyê niha li her derê dest bi xebatên bengîtiyê kirine. Lê gorî raporan kesên ku ji bo berdana madeyan serî li şaredariyan didin ji sedî 95 bernadin û berdewam dikin. Ji ber wê divê em nehêlin ku zarokên me dest bi tiryakê bikin.”
