Danê nîvro rejîma Îranê careke din bi mûşekan êrîşî baregeha Komeleya Zehmetkêşên Kurdistanê ya li Geliyê Alaneyê kir.
Endamê Komîteya Navendî ya Komeleya Zehmetkêşên Kurdistanê Ehmed Hisên Pena derbarê êrîşa nû ya Îranê ya li ser baregehên partiya wan a li Geliyê Alaneyê, agahiyên nû parve kir.
Ehmed Hisên Pena derbarê êrîşa Îranê de wiha got: “Saet 13:30an, Îranê careke din bi mûşekan êrîşî baregeha Komeleya Zehmetkêşên Kurdistanê ya li Geliyê Alaneyê kir. Heya niha tu agahiyek fermî derbarê hebûna qurbanî yan ziyanên canî de nîne. Her wiha ev êrîş berdewamiya êrîşên mûşekî û balafirên bê mirov ên Îranê ye ku li dijî baregehên partiyên Rojhilatê Kurdistanê yên li Herêma Kurdistanê pêk tîne.”
Ehmed Hisên aşkere kir ku li gorî daneyên Komeleyê, ji destpêka şerê navbera Îran û Amerîkayê ve heta niha, hejmara giştî ya mûşek û dronên ku ji bo armancgirtina kampên Komeleyê hatine bi kar anîn, gihîştiye zêdetirî 102 mûşek û dronan.
Hêjayî gotinê ye ku tevî hebûna danûstandinên di navbera Tehran û Washingtonê yên ji bo rawestandina şer, lê belê rejîma Îranê rojane û bi awayekî berdewam xaka Herêma Kurdistanê û bi taybetî partiyên Kurd ên Rojhilatê Kurdistanê dike hedef.
Ji ber van êrişên Îranê, heta niha zêdetirî 30 kes ku hinek ji wan welatiyên sivîl in û beşekî din jî pêşmergeyên partiyên Rojhilat ên Herêma Kurdistanê ne, şehîd bûne.
