Şerê bi Îranê re çek cebilxaneyên Amerîkayê kêm kiriye. Derket holê ku Pentagon ji şîrketên sereke yên çek û pergalên parastinê çêdikin xwestiye ku di nava 21 rojan de planên hilberîna çekan radestê wan bikin.
Şerê domdar ê bi Îranê re fuze û cebilxaneyên leşkerî yên Amerîkayê kêm kirin. Li ser vê yekê Pentagonê ji şîrketên sereke yên çek û teknolojiyên parastinê çêdikin xwest ku di nav 21 rojan de planên hilberîna çekan zêde bikin, û çekên pêwîst bi leztir teslîm bikin.
Li gorî nûçeyên Reutersê, ev daxwaz di belgeyekê de ku ji aliyê Cîgirê Wezîrê Parastinê yê Amerîkayê, Steve Feinberg ve hatiye amadekirin, cih girtiye. Berdevkê Pentagonê Sean Parnell jî belgeyê piştrast kir.
Washington dixwaze şîrketên çekan ji hilberîna hêdî û ji kapasîteya bi sînordar derkevin û ber bi hilberîna bilez û girseyî ve plansaziyên xwe biguherînin.
Stokên fuzeyên Patrîotê kêm dibin
Nîşaneyên kêmbûna stokên çekan, di rapor û analîzên saziyên leşkerî de jî tên dîtin. Li gorî Navenda Lêkolînên Stratejîk û Navneteweyî (CSIS), beriya destpêka şerê Îranê, nêzî 2 hezar û 330 fuzeyên Patrîotê di stokên Amerîkayê de hebûn. Lê di dawiya Tîrmehê de ev hejmar daketiye bin hezar fuzeyan.
CSIS di rapora xwe ya Gulanê de hişyarî dabû ku dagirtina ji nû ve ya stokên Patrîot, THAAD û Tomahawk dikare çend salan bidome.
Ukrayna jî dikare bandorê bibîne
Kêmbûna stokên Amerîkayê dikare rasterast bandorê li ser piştgiriya leşkerî ya Ukraynayê jî bike. Ukrayna ji bo parastina bajar û baregehên xwe li dijî êrîşên fuzeyî û balafirên Rûsyayê, bi giranî pişta xwe dide pergalên Patrîotê.
Belgeyên fermî, Trump derewand
Heta çend roj berê jî Serokê Amerîkayê Donald Trump digot ku yên dibêjin stokên çekên Amerîkayê kêm bûne, “derewan dikin” û ragihand ku Amerîka di warê çekan de bi kêmasiyeke girîng re rû bi rû nîn e. Lê daxuyaniyên paşîn ên Pentagonê û raporên saziyên analîzê nîşan didin ku Amerîka niha ji bo bilezkirina hilberîna cebilxaneyê û ji nû ve dagirtina stokên xwe yên heliyayî planên nû amade dike.
