Cenazeyê siyasetmedarê Kurd û neviyê Şêx Seîd, Hasan Basrî Firat li gundê Qolhesarê li kêleka kalikê wî Şêx Mehmûd hate veşartin. Di merasîma cenaze de axaftin hatin kirin û hate destnîşankirin ku Hasan Basrî Firat kedkarê doza Kurdistanê bû û tu carî li ber zilmê serê xwe netewand.
Hevşaredarê Xinûsê yê berê Hasan Basrî Firat ku neviyê Şêx Seîd e, roja 27ê Tîrmehê li Almanyayê koça dawî kiribû. Îro cenazeyê Hasan Basrî ji aliyê malbat û xizmên wî ve li Balafirgeha Erziromê hat pêşwazîkirin. Piştî wergirtina cenazeyê wî bi beşdariya Parlamenterê DEM Partiyê ya Erziromê Meral Daniş Bektaş, nûnerên sazî, rêxistinên sivîl û siyasî, hevşedarên DEM Partiyê yên navçeyên Xinûs, Qereçban, Gimgim û Qereyazî û bi sedan kesan cenaze anîn û birin mala wî.
‘Wî peyamek bilind da me’
Serokê Komeleya Şêx Seîd Kasim Firat ê ku pismamê Hasan Basrî ye di merasîmê de axivî û qala zordestiya li ser Hasan Basrî kir û wiha got: “Mixabin dagirker, zalim û Nemrûdên me ne hiştin ku Hesen xizmeta gelê xwe bike, bi awayê bêhiqûqî wî ceza kirin û ji ber zordariyê koçî Ewropayê kir. Li Almanyayê bi hesreta zarok, welat, dost û hevalên xwe 10 sal di bin êsirtiya penaberiyê de ma. Wî peyamek bilind da me û em bi vê peyamê gelek kêfxweş bûn. Hasan Basrî got ‘Em neviyên Şêx Seîd in, rêya me rêyek serbilindî ye, em çok danaynin û em serê xwe xwe li ber zilmê natewînin’.”
‘Kedkarê doza Kurdistanê bû’
Piştî axaftina Kasim Firat, parlamenter Meral Daniş Bektaş jî axivî û bal kişand ser keda Hasan Basrî Firat ya di doza gelê Kurdistanê de û wiha got: “Hasan Firat şehîdê Kurdistanê û gelê Kurd e. Hem hate girtin hem doza bêhiqûqî lê hate kirin û qeyim danîn ser keda wî. Zilmek mezin li ser wî hate kirin. Hasan Basrî Firat şehîdê me ye.”
Piştî axaftinan nimêja Înê û cenaze hatin kirin û fatîhe ji bo Firat hatin xwendin. Paşê jî cenaze li kêleka gora Şêx Mehmûdê bavê Şêx Seîd hate veşartin.
Piştî definkirina cenaze marasîm bi dawî bû û fatîhe hatin xwendin. Dê ji bo Firat li gundê Qolhesarê sê roj şîn were danîn.
