Hevseroka Giştî ya DBPê Çîgdem Kiliçgun Ûçar di çalakiya li pêş Şaredariya Wanê de axivî û diyar kir ku wê Gelê Wanê bersiva aqilê dewletê careke din bide. Hevseroka Giştî ya DEM Partiyê Tulay Hatîmogullari jî got: “Desthilat amadekariya darbeyek din a siyasî dike û hewl dide pêvajoya nû xera bike.”
Li Wanê piştî 3 sal û 9 meh cezayê hefsê dan Hevşaredarê Bajarê Mezin ê Wanê Abdullah Zeydan, çalakiyên nerazîbûnê hatin destpêkirin û ji duh ve gelê Wanê li pêş şaredariyê nobetê digire. Hevseroka Giştî ya Partiya Herêmên Demokratîk (DBP) Çîgdem Kiliçgun Ûçar û Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari tev li çalakiya li pêş şaredariyê bûn û li vir bi girseyî daxuyanî dan.
‘Em ê vîna xwe biparêzin’
Di daxuyaniyê de ewilî Hevşaredar Abdullah Zeydan axivî û diyar kir ku gelê Wanê tevî sermayê jî vîna xwe diparêze. Abdullah Zeydan destnîşan kir ku encam çi dibe bila bibe dê ew vîna gel biparêzin û got: “Em beşekî vê têkoşîna pîroz in û têkoşîna demokrasî, aştî û edaletê didin, li dijî vê bêşermiya desthilatê em rûmeta xwe diparêzin. Em dizanin ev pêvajoyek kumpasê ye û Dadgeha Mafê Mirovan a Ewropa (DMME) jî vê biryar daye. Dixwazin bi kûmpasan careke din vîna gel desteser bikin.”
‘Dosyeya Zeydan vala ye’
Piştre Hevserokê DBPê yê Wanê Cemal Demîr axivî û diyar kir ku desthilat zilma xwe weke Şûrê Demoklesê li ser gel dihejîne. Cemal Demîr destnîşan kir ku Wanê di hilbijartinê de dîrok nivîsand û her 14 şaredariyên xwe jî bi dest xist û wiha got: “Me di vî welatî de AKP kir partiya tabelayê. Niha jî dixwazin bi kûmpasên darazê vîna gel desteser bikin. Ez weke hiqûqnasekê vê dosyayê dinêrim û dibînim ku ev dosye dosyeyeke vala ye û ji aliyê Îstînafê ve nehatiye qebûlkirin. Ev helwest, helwesteke siyasî ye ne hiqûqî ye.”
‘Wan rûmeta me ye’
Hevşaredara Bajarê Mezin a Amedê Serra Bûcak jî bal kişand ser berxwedana Wanê û diyar kir ku pergala qeyûm pergala kûmpasê ye. Serra Bûcak anî ziman ku gelê Wanê li cem vîna xwe disekine û ev yek anî ziman: “Em ê bi ser bikevin û ew dê winda bikin. Em Amedê li cem gelê Wanê ku her 14 şaredariyên xwe jî bi dest xistine, ne. Yên ku xwestin vîna vî gelî desteser bikin, bi berxwedana ciwanên rûken re rû bi rû man. Wan rûmeta me ye.”
‘Kurd wê li dijî polîtîkayên şerê taybet têbikoşin’
Hevseroka Giştî ya DBPê Çîgdem Kiliçgun Ûçar jî bal kişand ser têkoşîna Kurdan ya azadiyê û diyar kir ku niha li Wanê jin û zarok hêmanên demokrasiyê bi cih tînin. Çîgdem Kiliçgun Ûçar bi lêv kir ku gelê Wanê dersek da aqilê dewletê yê şer, qeyûm, înkar û bişaftinê û wiha axivî: “Di hiqûqa vî dewletê de nasnameya Kurdan heye? Ew hiqûqa em tê de nebin, hiqûqa serdestan e, lewma Kurd vê biryarê nasnakin. Me Wan 2 caran bi dest xist û niha careke din êriş dikin. Em ê dîsa bi ser bikevin û dê gelê Wanê bersiva polîtîkayên neçareseriyê yên aqlê dewletê bide. Divê navê pêvajoya nû bi demokrasiyê û aştiyê bê bibîranîn. Ji ti kesî ti deng dernakeve, lê li Îmraliyê di 12 metrekareyan de kedeke mezin heye û dem dema piştgiriya vê kedê ye. Gelê Kurd wê li dijî polîtîkayên şerê taybet bi paradîgmaya Birêz Ocalan têbikoşe. Dawiya vê berxwedanê azadî ye.”
‘Bi polîtîkayên qeyûm bersiva pêvajoyê dide’
Hevseroka Giştî ya DEM Partiyê Tulay Hatîmogûllari jî bal kişand ser serkeftina Wanê ya di hilbijartina xwecihî de û wiha got: “Destên xwe ji şaredariyên me bikşînin, em dixwazin xizmeta gelê xwe bikin. Cezayê hatiye dayîn ne tenê desteserkirina gelê Wanê ye, her wiha binpêkirina qanûnên xwe dikin. Ev desthilat amadekariya darbeyeke din a siyasî ye. Dîsa bi copên xwe, leşkerên xwe, panzerên xwe şaredarî dorpêç kirine. Em li Wanê rê nadin vê hewldana darbeyê. AKP hewl dide pêvajoya nû xera bike û bi polîtîkayên qeyûm bersiva pêvajoyê dide. Em li pişt pêvajoyeke aştiya birûmet in. Banga me ji bo qesrê ye, em ê têkoşîna mezintir bikin û ji bo gelê xwe bixebitin.”
Piştî axaftinan gel li pêş şaredariyê govend gerand. Nobeta gel a li ber şaredariyê didome.
