Derket holê ku beriya Gulistan Doku were windakirin ji aliyê POL-NETê ve gelek jêpirsînên derqanûnî derbarê wê de hatine kirin.
Her roj geşedanek nû derbarê dosyeya Gulistan Doku ya ku bi destê wezîfedarên dewletê hate windakirin, derdikevin holê. Beriya Gulistan Doku were windakirin derbarê wê de gelek agahî tên ber destan. Li gorî nûçeya nûçegihana JinNewsê Şehrîban Aslan; derket holê ku polîs û wezîfedarên dewletê yên di çarçoveya lêpirsîna Gulistan Doku de hatine binçavkirin, du meh beriya ku were windakirin, bi rêya POL-NETê gelek jêpirsînan neqanûnî derbarê wê de hatine kirin.
Di çarçoveya lêpirsîn ango dosyeya Gulistan Doku de pêla binçavkirin û girtinan didome. Di 27ê Tîrmehê de heman çarçoveyê de Serdozgeriya Komarê ya Erziromê derbarê 18 kesan de biryara binçavkirinê dabû û ew kes hatibûn binçavkirin.
Polîs û leşker di nava gumanbaran de ne
Hat zanîn ku hema hema hemû kesên hatine binçavkirin karmend dewletê, polîs û leşker in û polîsan di dîrokên cuda de bi rêya sepana POL-NETê jêpirsînên derqanûnî derheqê Gulistan Doku de kirine.
Belgeya ku ji aliyê JinNewsê ve hate bidestixistin; nîşan dide ku beriya Gulistanê were windakirin, di 25ê Mijdara 2019an de, polîsekî bi navê M.K., ku li Ofîsa Cihê Malê ya Daîreya Polîsan a Dêrsimê dixebitî, saet li 16:14an bi karanîna sepana modela ewlehiyê ya POLCEPê bi hejmara nasnameyê ya Komara Tirkiyeyê ya Gulistan Doku pirsî ye. Her wiha derket holê ku heman polîs di navbera saet 08:08 û 08:47an de çar caran û di 4ê Kanûna Pêşîn a 2019an de jî saet li 17:49an carekê li ser sîstemê jêpirsîna Gulistan Doku kiriye.
Lêgerîna derqanûnî
Di belgeyê de tê gotin ku polîsekî din ê bi navê C.S., diyar kiriye ku Gulistan Doku di 4ê Çileya 2020an, saet li 22:41an, rojek beriya winda bibe di pergalê de lêgerîn çêbûye.
Polîs E.B., ku li midûriyeta polîsan a Dêrsimê dixebite, di 5ê Çileya 2020an de, roja ku Gulistanê winda bûye, saet di 23:35an de, li ser pergalê bi hejmara nasnameyê lêgerîna Gulistan Doku kiriye û balkêş e ku li wêneyên karta nasnameyê, belgeya ajotinê, ewlehiya taybet, eşkaliya krîmînal û wêneyên pasaportê nihêrî ye.
Di belgeyê de her wiha tê gotin ku E.B., di heman rojê de gelek caran li ser sîstemê lêgerîna Gulistan Doku pêk aniye.
