Îranê, ji dozên cuda bi giştî 10 sal û rojek cezayê girtîgehê li Hadîse Morvaridî û Merziye Meşhedî ku di xwepêşandananên meha Çileya 2026an de hatibûn binçavkirin, birî.
Dadgehên Rejîma Îranê her roj cezayên girtîgehê li kesên ku di xwepêşandanên meha Çileya 2026an de hatine girtin, dibire.
Hedîse Morvaridî û Merziye Meşhadî ku li girtîgeha Vekilabadê ya Meşhedê tên girtin, ji dozên cuda 10 sal û rojek cezayê girtîgehê li wan hat birîn.
Hedîse Morvaridî ya 24 salî ji ber sûcê ‘heqareta li rêber’ 2 sal û ji ber sûcê ‘propagandaya li dijî rejîmê’ salek cezayê girtîgehê, bi temamî mehkûmî 3 sal cezayê girtîgehê hate kirin. Hedîse Morvaridî di 7ê Çileya 2026an de li bajarê Farimanê hate girtin û di vê dawiyê de sewqî qawîşa hejmar 1 a girtîgeha Vekilabadê hate kirin.
7 sal cezayê girtîgehê lê hate birîn
Merziye Meşhedî jî ji ber sûcê ‘têkilîdanîna bi saziyên medyayê yên girêdayî Îsraîlê re’ 7 sal û rojek cezayê girtîgehê lê hat birîn. Hat ragihandin ku Merziye Meşhedî di heman demê de, bi îdiaya xwepêşandanên meha Çileyê û têkiliya bi saziyên medyayê yên bi zimanê Farisî yên li derveyî welêt dixebitin re hate binçavkirin, piştre sewqî qawîşa Hejmar 1 a girtîgeha Vekilabadê hate kirin.
Li Îranê xwepêşandanên meha Çileya 2026an, di 28ê Kanûna 2025an de bi grev û xwepêşandanên bazirgan û karkerên bazarê li Tehranê dest pê kir. Paşê li bajarên cuda belav bû û bi beşdariya komên civakî yên cuda, bû yek ji xwepêşandanên herî mezin ên salên dawî.
