Şaredariya Peyasê li Parka Rojavayê bi dirûşmeya “Em bi notayên aştiyê, jiyana hevpar bistrên” konserek li dar xist.
Şaredariya Peyasê bi dirûşmeya “Em bi notayên aştiyê, jiyana hevpar bistrên” li Parka Rojava ya navçeya Peyas a Amedê konserek bi coş li dar xist. Kargeha Muzîkjenên Yektayê ya şaredariya Peyasê bi gel re stranên xwe gotin. Şaredarî bi vê konserê armanc dike ku moral û motivasyona gelê Amedê zêde bike û piştgiriyê bide pêvajoya Aştî û Civaka Demokratîk. Hevşaredara Peyasê Berîvan Gulşen Sîncar jî tev lî konserê bû û welatiyên Amedê bi girseyî beşdarî konserê bûn. Gel bi coş û kelecaneke mezin govend gerand û stranên Kurdî gotin.
‘Ked û têkoşîna me bi saxlemî berdewam dike’
Hevşaredara Peyasê Berîvan Gulşen Sîncar beriya konserê axivî. Berîvan Gulşen Sîncar anî ziman ku ji aliyê ked û zanyarî, karên civakî û çandê ve hevalên wan ji bo îşev ew werin cem hev şahiyek plan kirine û got: “Me got em govenda xwe jî bigirin, em dem bi dem dîsa werin cem hev. Ev du meh in, wekî asayî em di heftiyê de du şevan diçin taxan û gundan. Bi hev re tên cem hev; hem govendê digirin, hem jî bi xort û zarokan re lîstikan dilîzin. Hem jî jin xebatên xwe ava dikin û bi kar tînin. Ev alî çêker û kêfxweş e. Hûn dizanin ku 8 sal derbas bûn heta ku em hatin ser erka xwe, ser şaredariyê. Îradeya gel, xebata gel, jiyana çandî û zimanî li her derê bi kêmasiyeke pir xurt derketibû holê. Li bi saya we dîsa em hatin ser wezîfe û erka xwe. Jiyana me, dîroka me, ked û têkoşîna me bi saxlemî berdewam dike.”
Piştî axaftina Berîvan Gulşen Sîncar endamên Kargeha Yektayê bi stranên xwe ve gel coşandin. Gel bi tîlîliyên xwe ve govendeke berfireh gerandin.
