Malbata Mûsa Tan ê ku di 5ê Tîrmehê de li Êlihê di encama êrîşeke çekdarî de jiyana xwe ji dest dabû, li heman kolanê daxuyaniyek da û xwest bûyer were ronîkirin.
Di 5ê Tîrmehê de li Êlihê Mûsa Tan ji aliyê kes an kesên nasnameya wan nediyar ve li kolanê bi çekê hat kuştin û hê jî ji aliyê kê ve û ji bo çi hatiye kuştin ne diyar e.
Malbata Tan ji bo bûyer were ronîkirin îro li kolana ku Mûsa Tan lê hatibû qetilkirin, daxuyanî da û ew bi bîr anî. Malbata Mûsa Tan, xizm û hezkiriyên wî piştî ku şîna wan bi dawî bû ji ber mala Şînê ya Seyît Hasan a Taxa Beş Evlerê ya Êlihê heta Taxa Hîlalê meşiyan û qûrnefîl danîn cihên ku Mûsa Tan lê hatibû kuştin.
Keça Mûsa Tan, Fatma Tan di bîranînê de axivî.
‘Em ê doza xwe bidomînin’
Fatma Tan diyar kir ku kesên ku bavê wê kuştine dê rojeke derkevin holê û wiha got: “Ew li kuderê bin bila li ser wî guhî ranezên, em ê her tim dozdarên birîna bavê xwe bin. Yên ku wisa kiribin ger heqê wan li bavê min hebe, bila bibêjin; ‘heqê min hebû min wisa kir.’ Heke bi şaşî bibe jî, bila bibêjin ‘ez lêborîna xwe ji we dixwazim.’ Em ê bêjin li ser serê me û çavên me. Eger zelal nebe em ê vê bûyerê heta Ewropayê jî bibin. Heta ev bûyer zelal nebe em ê dest ji doza xwe bernedin. Heta faîl di zûtirî demê de neyê tespîtkirin û bûyer bê ronîkirin, em ê doza xwe bidomînin.”
