Tûra 16emîn a Kûpaya Cîhanê bi dawî bû. Bîletên dawiyê ya fînala çarîk Arjantin û Swîsre bi dest xist, tûrnûva dê bi maçên fînala çarîk berdewam bike.
Kûpaya Cîhanê ya 2026 FIFAyê di navbera 11ê Hezîranê û 19ê Tîrmeha 2026an de li Kanada, Meksîka û Dewletên Yekbûyî yên Amerîkayê (DYA) tê lidarxistin. Ev tûrnûvaya dîrokî bi 48 tîman û bi giştî 104 maçan, yekem car e ku Kûpaya Cîhanê ji aliyê 3 welatan ve mazûvaniya wê tê kirin.
Arjantîn dest ji têkoşîna xwe berneda
Di maça yekemîn a Tûra Yekemîn de duh di saet 19:00an de Arjantîn û Misir hatin hemberî hev. Di maçê de Misrê xurt dest pê kir û beşa ewil 1-0 bi serkeftina Misrê bi dawî bû. Misir di deqîqeya 67emîn de golek din jî avêt. Lê Arjantîn dev jî maçê berneda û piştî deqîqeya 79emîn maçê zivirand aliyê xwe û di 15 deqîqeyan de 3 gol avêt Misrê û 3-2 bi ser ket. Bi vî awayî Arjantîn derket fînala çarîkê.
Swîsre bi ser ket
Maçek din a Tûra 16emîn a di dawiyê de Swîsre û Kolombiya hatin hemberî hev. Maç di saet 23:00an de dest pê kir û maç 0-0 bi dawî bû. Maç 30 deqîqe hate dirêjkirin, di vê dema dirêjkirî de jî tu gol nehatin avêtin û maç çû penaltiyan. Di penaltiyê de Swîsre 4-3 bi serket û derket fînala çarîkê.
Bi maçên Arjantîn-Misir û Swîsre-Kolombiyayê Tûra 16emîn bi dawî bû. Bi vî awayî di fînala çarîk a kûpayê de Arjantîn û Swîsre bûn hevrikên hev.
Maçên fînala çarîkê wiha ne: Fransa-Fas, Spanya-Belçîka, Norveç- Îngilîstan, Arjantin-Swîsre.
Di maça yekemîn a fînala çarîkê de Fransa û Fas dê di 9ê Tirmehê de di saet 23:00an de werin hemberî hev.
