Semsûr- Bernameya DBPê ya ‘Em gotina aşitiyê bi gel re ava dikin’ li Semsûrê dihatin birêvebirin, îro li gundê Çokpîngarê yê li navenda bajêr bi dawî bûn. Di civînê de hat gotin ku Kurd pêşengên demokratiyê ne û hat diyarkirin ku deriyê aştiyê tê wateya vekirina deriyê Îmraliyê ye.
Civînên gel ên DBPê ku bi dirûşma ‘Em gotin aştiyê bi gelan re ava dikin’ li Semsûrê roja dawî de li gundê Çokpîngarê hat lidarxistin. Civîna ku Hevseroka Giştî ya DBPê Çîgdem Kiliçgun Uçar û şandeya pê re tevlî bûn, rastî eleqeyeke mezin hat.
Civîna gel a li gundê Çokpîngarê ji bo bîranîna kesên di têkoşîna azadiyê de jiyana xwe ji dest dane, bi deqeyeke rêzgirtinê dest pê kir. Di dema rêzgirtinê de welatiyan bê navber dirûşmeyê ‘Şehîd Namirin’ berz kirin.
‘Kurd pêşengên demokrasiyê ne’
Piştî rêzgirtinê Hevseroka Giştî ya DBPê Çîgdem Kiliçgun Uçar li ser pêvajoyê nirxandin kir û diyar kir ku armanca yekane ya têkoşînê ew e ku li vî welatî her kokên etnîkî û bawerî bi awayekî wekhev bijîn û wiha axivî: “Ev welat ji aliyê civakî ve tu carî nebû dewlet-netewe û wê nebe jî. Ji ber van polîtîkayên yekperest her kesî welat biterikand, hatin girtin. Lê di vê sedsalê de Kurd bi têkoşîna xwe birûmet derketin û îro dixwazin vê encam bigirin. Dewlet bi israr bêje ‘Tirkiyeya bêteror’, lê di çavê civakê de ev pêvajo Pêvajoya Civaka Demokratîk e. Her gava ku tevgera Kurd avêt, ji bo dewlet gavên bi cesaret biavêje bû. Hemû hêzên hegemonîk naxwazin Kurd li Rojhilata Navîn bihêz bin. Lê bila vê zanibin ku Kurd êdî pir bihêztir in û pêşengên demokrasiyê ne.”
‘Deriyê aştiyê vekirina deriye Îmraliyê ye’
ÇÎgdem Kiliçgun Uçar bal kişand tecrîda li ser Rêberê Gelê Kurd Abdullah Ocalan û ev tişt anî ziman: “Kurd niha pêşengiya demokrasiyê dikin û ji vê dewletê re dibêjin demokratîk bibe. Êdî Rojhilata Navîn a bê Kurd ne gengaz e. Birêz Ocalan, hevalên me yên ku îro ne di nav me de ne û gelê me îdeala demokratîk a vê welatî gihandin vê sedsalê. Kurd dema ku têkoşiyan çawa bi werekî nêz bûn, di dema avakirina aşitiyê de jî wê bi heman wêrekbûyînê nêz bibin. Muzakereyeke wisa dîrokî ne tenê meseleyeke di navbera Kurdan û AKPê de ye. Ev muzakereya ku paşeroja ciwan, jin û her kesî lê tê axaftin û gotin e. Deriyê aşitiyê tê wateya vekirina deriyê Îmraliyê, deriyê aşitiyê tê wateya vegera her kesên ku neçar mane biçin sirgûnê.”
‘Em aştiyê dixwazin’
Piştî axaftina Çîgdem Kiliçgun Uçar, welatiyên ku beşdarî bernameyê bûn li ser pêvajoyê axivîn. Dayikeke ya ku du zarokên xwe di têkoşînê de winda kirine, wiha got: “Em êdî naxwazin xwîna tu kesî birêje, em aşitiyê dixwazin.”
Dayikeke din a tevlî civînê bû destnîşan kir ku ew naxwazin êdî xwîn birêje û ev tişt vegot: “Em dixwazin Rêberê me were berdan. Em dixwazin aşitî were.”
Dayikeke din jî diyar kir ku ew dixwazin gorên zarokên wan ên di têkoşîna azadiyê de jiyana xwe ji dest dane hebin û ev tişt anî ziman: “Em gorên zarokên xwe dixwazin. Ji bo vê yekê jî em aşitiyê ji her tiştî bêtir dixwazin û hêvî dikin ku aştî zûtirîn bê.”
Welatiyekî din jî bal kişand ser têkoşîna Şehîd Mazlum Dogan û wiha got: “Me serê xwe di vê rêyê de daniye. Me soz daye Mazlum Dogan, ji ber ku Mazlum Dogan hevalê Ocalan e.”
Civîn bi tilîlî û çepikan bidawî bû.
